SQO sport mektepterindegi tekserý: Basqarma bastyǵy sógis aldy, tergeý júrip jatyr

PETROPAVL. QazAqparat - SQO prokýratýrasy «Olımp» jáne «Delfın» balalar men jasóspirimder sport mektepterinde tekseris júrgizdi, dep habarlaıdy QazAqparat.

Tekserý barysynda eńbek zańnamasyn buzý faktilerimen qatar, «Delfınde» biliktilik sanatyn zańsyz berý, «Olımpte» oqýshylardy sheshiný oryndarymen, sport jabdyqtarymen qamtamasyz etpeý, jattyqtyrýshy retinde jumysqa zańsyz alynǵan adamdarǵa negizsiz jalaqy tóleý faktileri anyqtaldy.

Anyqtalǵan kemshilikter boıynsha oblys ákimdiginiń atyna, dene shynyqtyrý jáne sport basqarmasyna qadaǵalaý aktileri engizildi.

Ony qaraý qorytyndysy boıynsha bıýdjetke 6,8 mln teńge qaıtaryldy.

14 tulǵa ártúrli jaýapkershilikke tartylǵan, 4 tulǵa atqarǵan laýazymynan bosatylyp, 2 adam biliktilik sanatynan aıyryldy.

Sondaı-aq dene shynyqtyrý jáne sport basqarmasynyń bastyǵy Sergeı Melehovke sógis berildi.

Eńbek zańnamasyn buzý boıynsha kináli tulǵalar ákimshilik jaýapkershilikke tartyldy.

Eńbekaqyny negizsiz esepteý bóligindegi negizsiz aqsha jınaý, jumysqa zańsyz alý boıynsha tekseris materıaldary protsestik sheshim qabyldaý úshin quqyq qorǵaý organdaryna (PB, ETD) berilgen.

Sportshylardyń jarysqa jaramdylyǵy týraly anyqtamaǵa dárigerdiń qolyn qoıý faktileri jáne bankke qaıyrymdylyq kómek kórsetý týraly haty boıynsha Petropavl polıtsııa basqarmasy sotqa deıingi tergeý bastady.