SQO sottarynda azamattyq isterdiń 16 paıyzy tatýlasý rásimimen aıaqtalǵan
PETROPAVL. QazAqparat – Soltústik Qazaqstan oblysynyń sottaryna byltyr 13 myńnan astam azamattyq is túsken, sonyń 9,5 myńǵa jýyǵy óndirispen aıaqtaldy, dep habarlaıdy QazAqparat tilshisi.
Óńirlik kommýnıkatsııalar qyzmetinde ótken baspasóz máslıhatynda SQO sotynyń azamattyq ister jónindegi sot alqasynyń tóraǵasy Aıdar Smaǵulov ótken jyldy qorytyndylady.
Byltyr oblys sottaryna 13 myńnan astam azamattyq is túsken. Onyń 4 myńǵa jýyǵy qaıtarylǵan. Al qalǵany óndirispen aıaqtaldy. Sonyń 5 629-y boıynsha sot úkimi shyqty.
«Sotsyz tatýlasý ınstıtýtyn damytý - basym baǵyttardyń biri. Byltyr 1 341 iske nemese 16 %-ǵa jýyǵyna tatýlasý rásimi qoldanyldy. Sonyń ishinde medıatsııa arqyly 920 is aıaqtaldy, 415-inde eki tarap mámilege kelse, 6 is partısıpatıvtik rásimmen jabyldy. Byltyr zańnamaǵa azamattyq is júrgizý zańnamasyn jetildirýge jáne daýlardy sottan tys jáne sotqa deıin retteý ınstıtýttaryn damytýǵa baǵyttalǵan túzetýler engizilip, bıyl iske qosyldy.
Sotqa deıingi hattama ınstıtýty engizildi. Bul taraptar sotqa usynylǵan dáleldemelerdi bir-birine ashatyn qujat. Bul jańashyldyq taraptardy tártipke keltirip, sotqa shaǵym bergenge deıin dáleldemeler jınaýǵa jaýapkershilikpen qaraýǵa múmkindik beredi dep úmittenemiz. Sonymen qatar, bul taraptarǵa sotqa talap aryz qabyldanǵanǵa deıin ekinshi tarap usynǵan dálelderdiń mazmunyn bilýge jáne tatýlasý múmkindigin qarastyrýǵa jasaıdy. Nátıjesinde tatýlasý arqyly aıaqtalǵan ister kóbeıedi dep oılaımyz», - deıdi Aıdar Smaǵulov.
Sotqa deıingi hattama pılottyq rejımde SQO-da jeltoqsan aıynda qoldanyldy. Oblystyń sottary 23 sotqa deıingi hattama jasasa, sonyń 9-ynda is tatýlasýmen aıaqtaldy.
«Janjaldardy retteýde álemniń ozyq elderi tatýlastyrý rásimderin keńinen qoldanady. Zańnama taraptardy tatýlastyrýǵa baǵyttalǵan. Onyń kóptegen artyqshylyǵy bar; ýaqyt pen qarjy únemdeledi, taraptarǵa janjaldy ózara tıimdi sharttarmen retteýge múmkindik beriledi, eń bastysy - daýdy beıbit jolmen sheshý iskerlik, dostyq qarym-qatynasty saqtaýǵa sep», - deıdi Aıdar Smaǵulov.
Qazirgi ýaqytta SQO-da 20 kásibı medıator jumys isteıdi. Olar byltyr 134 daýdy sheshti.
