SQO: Solenoe kólinde balyq kásipkerdiń kesirinen qyrylǵany anyqtaldy
PETROPAVL. KAZINFORM – Soltústik Qazaqstan oblysy Esil aýdanyndaǵy Solenoe kólinde balyqtyń qyrylýyna jeke kásipkerdiń beıǵamdyǵy sebep bolǵan. Aeratsııa jumysynyń ýaqtyly júrgizilmeýinen sý jándikteri ottegi jetpeı, tunshyǵyp ólgen.
Jaýapty mamandar SQO Esil aýdany Pokrovka eldi mekeniniń mańyndaǵy Solenoe kólinde balyqtyń qyrylǵandyǵyn áleýmettik jelige monıtorıng júrgizý barysynda bilgen.
Іstiń anyq-qanyǵyna jetý úshin oqıǵa ornyna jumys toby attandy. Onyń quramyna memlekettik organdar, ınspektsııa, ekologııa departamentiniń, veterınarııa qyzmetiniń ókilderi jáne oblystyq tabıǵı resýrstar jáne tabıǵat paıdalanýdy retteý departamentiniń, balyq sharýashylyǵy ǵylymı-óndiristik ortalyǵynyń mamandary kirgen. Kólden 150 keli ólgen tuqy balyǵy jınap alyndy.
«Ekologııa departamenti men veterınarlyq qyzmet balyqtyń qyrylýyna ne sebep bolǵanyn anyqtaý úshin kól sýynyń, balyq ushasynyń synamasyn aldy. Búginde onyń qorytyndysy belgili. Balyq qysta otteginiń jetispeýshiliginen qyrylǵan. Bul fakti boıynsha ınspektsııa kóldi paıdalanýshyny jaýapqa tartý boıynsha qujat jınap jatyr», - deıdi Esil oblysaralyq basseındik balyq sharýashylyǵy ınspektsııasynyń bólim basshysy Ildar Kakımov.
Esterińizge salaıyq, sáýir aıynda Solenoe kólinde balyq qyrylǵanyn jazǵan edik. Sý aıdynyn «Chekýnov» jeke kásipkerligi jalǵa alǵan.
