SQO sharýalaryna kóktemgi egiske 71 myń tonna arzandatylǵan dızel bólindi
16 sáýirde SQO-ǵa kelgen QR Energetıka mınıstri Bolat Aqsholaqov óńir turǵyndarymen kezdesti. Qańtar aıynda Memleket basshysynyń tapsyrmasyna sáıkes mınıstrlik munaı ónimderin bólshek saýdada satýǵa shekti baǵany 180 kúnge belgilegen edi. Budan basqa, Prezıdenttiń janar-jaǵarmaı materıaldary naryǵyn reformalaý jónindegi tapsyrmasyna oraı birqatar shara qolǵa alynady.
«Bolashaqta munaı ónimderin óndirý jáne bólý salasynda ashyqtyq jáne transparenttilik qamtamasyz etiledi, iri tutynýshylar – «QazMunaıGaz» UK» AQ bazasynda 150 myń tonna kóleminde jáne «QTJ» AQ bazasynda 50 myń tonna kóleminde munaı ónimderiniń rezervi qurylady jáne QR aýmaǵynan avtomobıl kóligimen munaı ónimderin áketýge tyıym salý 6 aıǵa uzartylady», - dedi mınıstr.
Sondaı-aq kezdesý barysynda Bolat Aqsholaqov kóktemgi egis jumystaryn ýaqytyly júrgizý úshin aýylsharýashylyq taýaryn óndirýshilerge arzandatylǵan dızel otyny bólingenin jetkizdi. Munaı óńdeý zaýyttary tonnasynyń baǵasy 212 myń teńge bolatyn 400 myń tonna dızel otynyn qaldyrdy. Onyń 71 myń tonnasy SQO-ǵa beriledi. Bul el boıynsha bólingen kólemniń 5-shi bóligi.
«Qazirgi ýaqytta aýylsharýashylyq taýaryn óndirýshiler naryǵyn reformalaý maqsatynda aýyl sharýashylyǵy taýaryn óndirýshilerdiń derekter bazasy qurylyp jatyr. Oǵan baılanys derekteri, egistik jerlerdiń jalpy aýmaǵy, janar-jaǵarmaıǵa qajettilik kórsetiledi. Budan bólek otyn bólý úshin elektrondy-aqparattyq júıe engizilmek, bul aýyl sharýashylyǵy taýaryn óndirýshilerine munaı bazalarynan nemese resýrs ustaýshylardan munaı ónimderin óz betinshe satyp alýǵa múmkindik beredi», - dedi Energetıka mınıstri Bolat Aqsholaqov.
