SQO: Saılaý ýchaskeleri múmkindigi shekteýli jandar úshin arnaıy oryndarmen jabdyqtaldy
Soltústik Qazaqstan oblysynda 663 saılaý ýchaskesi bolsa, sonyń 93-i Petropavl qalasynda jumys istep jatyr. Bıyl saılaý ótetin oryndardyń barlyǵy múmkindigi shekteýli jandarǵa yńǵaıly bolýy úshin pandýstarmen jáne arnaıy daýys beretin oryndarmen jaraqtandyryldy.
«Múmkindigi shekteýli jandarǵa barlyq saılaý oryndarynda jaǵdaı jasalǵan. Ázirge turǵyndar tarapynan eshqandaı narazylyq týyndaǵan joq. Úılerinde daýys bergisi keletinderge jáshikter daıyn. Al kelip tańdaý jasaıtyndarǵa Petropavl qalasy boıynsha ınvataksı jumys isteıdi. Tek aldyn ala tapsyrys berý qajet», - deıdi Oblystyq saılaý komıssııasynyń tóraǵasy Erbolat Bekshenov.
Petropavldaǵy №586 saılaý ýchaskesinde 1372 tirkelgen. Búgin osy ýchaskede daýys berýi tıis múmkindigi shekteýli 14 azamat tańdaýdy úıde jasaıdy. Al «Biz birgemiz» qoǵamdyq birlestiginiń tóraǵasy, 1-shi toptaǵy múgedek Sergeı Sapko alǵyshqylardyń biri bolyp kelip, óz tańdaýyn jasady.
«Ár Qazaqstan azamaty el bolashaǵy úshin óz tańdaýyn jasap, belsendilik tanytý kerek. Men buryn úıde daýys beretinmin. Qazir barlyq mekemelerde bizge arnaıy jaǵdaı jasalǵandyqtan saılaý ýchaskesine kelip tańdaý jasadym», - deıdi Petropavl qalasynyń turǵyny Sergeı Sapko.
Oblystyq saılaý komıssııasynyń málimetinshe, búgin áskerı jáne medıtsınalyq mekemelerde barlyǵy 12 jabyq saılaý ýchaskesi jumys isteıdi.
