SQO «sary» aımaqta: Karantındik sharalar kúsheıtiledi

PETROPAVL. QazAqparat – Soltústik Qazaqstan oblysy koronavırýstyń taralýy boıynsha «sary aımaqqa» ótti. Osyǵan oraı búgin óńirdiń bas memlekettik sanıtar dárigeriniń jańa qaýlysy jarııalanady, dep habarlaıdy QazAqparat tilshisi.

SQO sanıtaırııalyq-epıdemıologııalyq baqylaý departamentiniń málimetinshe, óńirde KVI juqtyrǵandar sany kúrt artyp otyr. Ótken aptamen salystyrǵanda 129-dan 164-ke deıin, ıaǵnı 1,3 ese artqan. Juqtyrǵandardyń 86 %-y dárigerlerge aýyryp kóringen. Tek ótken táýlikte COVID-19 juqtyrýdyń 49 jaǵdaıy tirkeldi. Sonyń 22-si Petropavlda, 10-y Taıynsha aýdanynda jáne taǵy 7 aýdanda anyqtaldy.

«Aımaqtarda epıdemıologııalyq jaǵdaıdy baǵalaý matrıtsasyna sáıkes SQO búginnen bastap «sary aımaqqa» kirdi. Osyǵan baılanysty jańa qaýly shyǵady. Oblysta 12 sáýirden bastap birqatar karantındik shekteýler engiziledi», - deıdi SQO SEBD basshysynyń orynbasary Arman Kúshbasov.

Sanıtar dárigerdiń aıtýynsha, bılıardtardyń, balalardyń oıyn alańdarynyń, attraktsıondardyń, akvaparktiń jumysy toqtatylady.

As berýge tyıym salynyp, dinı nysandardyń jumysy shekteledi.

Sporttyq is-sharalar kórermensiz ótedi.

Mádenıet nysandary 30 adamnan asyrmaı jattyǵa alady.

Mektepke deıingi mekemelerdi 25 balamen kezekshi toptar ǵana jumys isteıdi.

Jeksenbi kúnderi qoǵamdyq monshalar men saýnalar jabylyp, kınoteatrlar men teatrlarda, kontsert zaldarynda kórermen sanyn 20 %-dan asyrýǵa bolmaıdy.

Shtattyq kestede 15 qyzmetkerden artyq bolǵan jaǵdaıda qyzmetkerlerdiń 50 %-y qashyqtan jumys isteýge kóshiriledi.

«Birer kúnnen keıin musylmandar úshin qasıetti ramazan aıy keledi. Oblystyń barlyq turǵyndaryn sanıtarlyq talaptardy saqtaýǵa shaqyramyz. Úıde otbasylyq úlken is-sharalardy ótkizýge tyıym salynǵan. Aýyzasharǵa tek otbasy músheleri ǵana qatysa alady. Talaptardy saqtamaý jaǵdaıdyń ýshyǵýyna ákelýi múmkin», - deıdi Arman Kúshbasov.

Qazir SQO-da koronavırýs ınfektsııasyn juqtyrǵandardyń sany 13 233-ke jetti.