SQO sanıtar dárigerleri mereke kúnderi astan ýlaný qaýpi joǵary ekenin eskertti

PETROPAVL. QazAqparat – Soltústik Qazaqstan oblysynda sanıtar dárigerler astan ýlanyp, meıramdy aýrýhanada ótkizbeý úshin qandaı talaptardy saqtaý qajettigin aıtty , dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń málimetinshe, mereke kúnderi astan ýlaný jaǵdaılary artady. Onyń birneshe sebebi bar.

Mereke ýaqytynda adam týǵan-týys, dostarymen kezdesip, mólsherden kóp tamaq ishedi.

Al asqa qoldanylǵan tamaq keı jaǵdaıda sapa men gıgıena standarttaryna saı kelmeýi múmkin.

Merekelik dastarhanǵa ázirlengen taǵamdar birneshe kún boıy saqtalyp, onyń buzylýyna, saldarynan adamnyń ýlanýyna ákelýi múmkin.

«Astan ýlanýǵa kóp jaǵdaıda etten jáne balyqtan jasalǵan taǵamdar, maıonez, qaımaq qosylǵan tiskebasarlar sebep bolady. Olar tez buzylatyn taǵamdar tobyna kiredi. Sondaı-aq olardyń qatarynda túrli torttar da bar. Daıyn salattar túni boıy jyly jerde, ústel ústinde qalyp qoısa, tańerteń ony paıdalanýǵa bolmaıdy. Jalpy mundaı taǵamdar +2+6 gradýs temperatýrada saqtalǵany jón», - deıdi departament mamandary.

Sanıtar dárigerlerdiń aıtýynsha, túrli kremderi bar torttar 6 saǵattan artyq saqtalmaıdy. Salattardy saqtaý merzimi – 3 saǵat qana.

Pisirilgen etti 12 saǵattyń ishinde tutyný qajet. Al qýyrylǵan et budan eki ese uzaq saqtalady.

«Juqpaly aýrýlardyń aldyn alý jáne astan ýlanyp qalmaý úshin Dúnıejúzilik densaýlyq saqtaý uıymy taǵam ázirleýde negizgi bes amaldy esten shyǵarmaý qajettigin usynady. Olar: tazalyqty saqtaý, shıki men piskendi aralastyrmaý, ónimderdi durys pisirý, azyq-túlikti qaýipsiz temperatýrada saqtaý, taza sýdy jáne taza ónimdi paıdalaný. Eń bastysy, aýyryp em izdegenshe, aýyrmaýdyń jolyn izdep, taǵamdy baıqap tutyný», - deıdi sanıtar dárigerler.