SQO prokýrorlary jol erejesin jıi buzatyn adamnyń «portretin» jasady
PETROPAVL. KAZINFORM – Soltústik Qazaqstan oblysynda sońǵy tórt aıda 107 jol kólik oqıǵasy tirkeldi. Bul ótken jyldyń osy kezeńimen salystyrǵanda 67 % joǵary.
Óńirlik kommýnıkatsııalar qyzmetinde jol erejesin saqtaýǵa qatysty baspasóz konferentsııasy ótti. SQO prokýratýranyń sotqa deıingi tergep-tekserý jáne qylmystyq qýdalaýdyń zańdylyǵyn qadaǵalaý basqarmasynyń bastyǵy Saıan Asqarov óńirdegi jaǵdaıǵa toqtaldy. Ótken 4 aıda SQO-da 107 jol-kólik oqıǵasy tirkelip, saldarynan 168 adam zardap shekken. Onyń 155-i jaraqattansa, 14 adam, sonyń ishinde bir bala qaıtys boldy.
«Ótken jylmen salystyrǵanda apat sany da, zardap shekkender men mert bolǵandar sany eselep artqan. Máselen byltyr osy aralyqta 5 adam qaıtys boldy. Jol-kólik oqıǵalarynyń jartysy Petropavlǵa tıesili, Qyzyljar aýdanynda – 11, Taıynsha aýdanynda 9 jol-kólik apaty tirkelgen. Mert bolǵandar sany Esil aýdanynda kóp, 6 jol-kólik oqıǵasynda 3 adam qaza tapty», - deıdi Saıan Asqarov.
Jol-kólik oqıǵasynyń basty sebebi – joldaǵy mádenıettiń tómendigi, jyldamdyq rejımin saqtamaý jáne joldyń qarsy betine shyǵyp ketý.
«Quqyq buzýshynyń portretine keler bolsaq, negizinen ol er adam, bıyl jasalǵan jol-kólik oqıǵalarynyń 87,8% nemese 94 jaǵdaıda rýlde er adam otyrǵan. 80 júrgizýshiniń jasy 50-ge tolmaǵan. Quqyq buzýshylardyń 56-sy 31 men 50 jas aralyǵynda bolǵan», - deıdi Saıan Asqarov.
Biraq rýlge mas kúıde otyratyndar men júrgizýshi kýáligi joqtardyń tarapynan jasalatyn qylmys sany azaıǵan. Byltyr osyndaı 12 fakti tirkelse, bıyl tórteýi anyqtalǵan.
Tórt aıda polıtsııa organdarynyń qaraýynda 50 qylmystyq is bolsa, sonyń 36-sy bıyl tirkelgen. 10 is sotqa jiberildi.
«Ótken jyldyń jeltoqsan aıynda Ǵabıt Músirepov atyndaǵy aýdanda «TOYOTA CAMRY» avtokóliginiń júrgizýshi aýa raıynyń qolaısyzdyǵyna qaramastan aldynda ketip bara jatqan úsh kólikti basyp ozbaq bolyp, joldyń qarsy betine shyqqan. Keıin rýlge ıe bola almaı qalyp, aýdarylǵan. Saldarynan jolaýshy aýdandyq aýrýhanada kóz jumdy. Sottyń úkimimen júrgizýshi bir jylǵa bas bostandyǵynan aıyryldy jáne bes jylǵa kólik júrgizý quqyǵynan aıyryldy», - deıdi basqarma bastyǵy.
Jalpy ótken 4 aıda SQO-da kisi óltirý qylmysyna qaraǵanda jol-kólik oqıǵalarynan 4,5 ese kóp adam qaza tapty.
Buǵan deıin SQO-da kásipkerler sý tasqynynan bolǵan shyǵyndy eseptep, baǵalata almaı jatqanyn aıtqan edik.
