SQO prokýrorlary otbasylyq janjalqoıdyń ortaq portretin jasady

PETROPAVL. KAZINFORM - Soltústik Qazaqstan oblysynyń prokýratýrasy turmystyq zorlyq-zombylyq derekterin taldap, otbasy shyrqyn buzatyndardyń ortaq áleýmettik-psıhologııalyq portretin jasady.

Qadaǵalaý organynyń málimetinshe, mundaı quqyq buzýshylyqtardyń basym bóligi naqty bir áleýmettik topqa jatatyn adamdarmen baılanysty. Zertteý qorytyndysy boıynsha, janjalqoılardyń negizgi bóligi — 30-50 jas aralyǵyndaǵy erler. Olar ádette jumyssyz nemese ýaqytsha ǵana tabysy bar.

Prokýratýra ókilderi janjalqoılardyń minez-qulqynda avtorıtarlyq basym, óz oıyn kúshpen dáleldeýge beıim, ózin-ózi baqylaý deńgeıi tómen ekenin aıtady. Mundaı adamdar kóbine otbasy múshelerine – jubaıyna jáne balalaryna qarsy agressııa tanytady, biraq qoǵamdyq ortada sabyrly kórinýi múmkin.

Sondaı-aq, prokýratýra ishki ister organdarymen birge júrgizgen saraptama nátıjesinde turmystyq qylmystardyń 70% astamy alkogoldik mas kúıde jasalatyny anyqtaldy.

Quqyq qorǵaýshylardyń aıtýynsha, ishkilikke salynǵandardyń kópshiligi birneshe ret profılaktıkalyq esepke alynyp, arnaıy emdeý mekemelerine jiberilse de, naqty oń nátıjege qol jetkizý qıyn.

SQO aýmaǵyndaǵy maskúnemderdi emdeýge mamandandyrylǵan jalǵyz mekeme Jambyl aýdanynda ornalasqan.

- Bir naýqas bul mekemege úsh-tórt ret túsýi múmkin. Emdelý merzimi 18 aıǵa deıin uzaryp ketken jaǵdaılar bar. Mekemede 45 kamera bar, biraq ondaǵy jazbalardy eshkim baqylamaıdy. 11 qyrkúıek kúni mekemede bir naýqas asylyp qaldy. Jyl saıyn munda jarty mlrd teńge bólinedi, biraq ol ózin aqtap otyrǵan joq, - deıdi SQO prokýrorynyń orynbasary Aleksandr Trıkachev.

Buǵan deıin Qazaqstanda erli-zaıyptylardyń ajyrasýyna turmystyq zorlyq-zombylyq basty sebep ekenin jazǵan edik.