SQO prokýratýrasy zańsyz kontenti bar 205 ınternet-resýrsty buǵattady
ASTANA. KAZINFORM — SQO prokýratýrasy ata-analardy balalardyń ınternet qaýipsizdigine mán berýge shaqyrdy.
Soltústik Qazaqstan oblysynyń prokýrorlary zańsyz kontenti bar toptardy buǵattady. Qadaǵalaý organy áleýmettik jeliler monıtorıngi sheńberinde ekstremıstik, terrorıstik sıpattaǵy aqparat, jasóspirimderdiń sýıtsıdin nasıhattaý jáne balalarǵa qatysty zorlyq-zombylyq áreketteri taratylǵan toptardy anyqtady.
— Mysaly, «POZOR PETRO» Telegram-arnasynda kámeletke tolmaǵandardyń ar-namysy men qadir-qasıetine nuqsan keltiretin posttar, sondaı-aq seksýaldyq sıpattaǵy beınerolıkter ornalastyryldy. «Kıbernadzor» aqparattyq júıesi arqyly qabyldanǵan sharalarmen atalǵan toptarǵa kirý buǵattalǵan. Jyl basynan beri oblys prokýratýrasy zańsyz kontenti bar 205 ınternet-resýrsty buǵattady, — delingen vedomstvo habarlamasynda.
Soltústik Qazaqstan oblysynyń prokýratýrasy ata-analardy kámeletke tolmaǵandardyń aqparattyq qaýipsizdigine erekshe nazar aýdarýǵa, olardyń ınternet-belsendiligine qyzyǵýshylyq tanytýǵa jáne olar qarap otyrǵan mazmundy baqylaýǵa shaqyrady.
Ata-analardyń balalaryna ýaqyt bólip, ınternetti qaýipsiz paıdalaný týraly únemi aıtyp otyrýy, sondaı-aq olardyń áleýmettik jeliler men messendjerlerdegi belsendiligin baqylaýy balalardy zańsyz áreketter men zııandy kontentten qorǵaýǵa kómektesedi.
Buǵan deıin Almaty oblysynda ınternet-alaıaqtyqqa qatysty 518 jalǵan habarlandyrý buǵattalǵany aıtyldy.
