SQO prokýratýrasy: 44 gektar aýmaqtaǵy zańsyz paıdaly qazba óndirý toqtatyldy

ASTANA. KAZINFORM — SQO prokýrorlary paıdaly qazbalardy óndirýge arnalǵan lıtsenzııalardy sot tártibimen jaramsyz dep tanydy.

Qadaǵalaý organy taldaý sheńberinde keń taralǵan paıdaly qazbalardy óndirýge lıtsenzııalardy zańsyz berýde kórinis tapqan óreskel zań buzýdy anyqtady.

«Jer qoınaýy jáne jer qoınaýyn paıdalaný týraly» kodekstiń 25-babyna sáıkes eldi mekender jerleriniń aýmaǵynda jáne olarǵa irgeles aýmaqtarda bir myń metr qashyqtyqta jer qoınaýyn paıdalaný jónindegi operatsııalardy júrgizýge tyıym salynady.

— Kodekstiń kórsetilgen normasyn buza otyryp, oblys ákimdiginiń kásipkerlik jáne ındýstrııalyq-ınnovatsııalyq damý basqarmasynyń laýazymdy tulǵalary eldi mekenderdiń jerlerinde ornalasqan jalpy aýdany 44 ga «Berezovka» jáne «Shahovskoe» ken oryndarynda paıdaly qazbalardy óndirýge lıtsenzııa berdi, — delingen Soltústik Qazaqstan oblysynyń prokýratýrasy habarlamasynda.

Sondaı-aq, bul ýchaskeler ishinara Orman kodeksiniń talaptaryna qaıshy keletin memlekettik orman qorynyń jerlerinde ornalasqan.

Oblystyń mamandandyrylǵan tabıǵat qorǵaý prokýratýrasynyń talap — aryzdary boıynsha sot joǵaryda atalǵan lıtsenzııalardy jaramsyz dep tanydy.

Búgingi tańda sot aktileri zańdy kúshine endi.

Sonymen qatar, prokýrorlyq qadaǵalaý aktisi boıynsha kináli laýazymdy tulǵalar tártiptik jaýapkershilikke tartyldy.

Jer qoınaýyn paıdalaný salasyndaǵy zańnamany saqtaý máselesi oblys prokýratýrasynyń baqylaýynda. 

Aıta ketelik jer qoınaýyn paıdalanýshylarǵa arnalǵan memlekettik aqparattyq júıe iske qosyldy.