SQO polıtsııasynda egizderdiń eki juby eńbek etedi
PETROPAVL. KAZINFORM – Soltústik Qazaqstan oblysynyń polıtsııa departamenti jas mamandar - egizderdiń jańa jubymen tolyqty.
Zahar jáne Nazar Kovalenko QR Іshki ister mınıstrligi B.Beısenov atyndaǵy Qaraǵandy akademııasynyń túlegi. Oqý ornyn bıyl úzdik aıaqtaǵan beseýdiń qatarynda aǵaıyndylar Astanadaǵy ІІM alqa otyrysyna qatysty.
Egizder polıtsııa mamandyǵyn mektepte oqyp júrgende tańdaǵan – ekeýi de quqyqtanýǵa qyzyǵýshylyq tanytyp, ádilettilik jolynda qyzmet atqarýdy maqsat etken. Sondaı-aq sportta da birqatar jetistikke qol jetkizgen. Osylaısha, olar akademııaǵa oqýǵa túsip, jaqynda Zahar polıtsııa leıtenanty pogonyn saltanatty jaǵdaıda Prezıdent Qasym-Jomart Toqaevtyń qolynan aldy.
- Mektepten keıin akademııaǵa oqýǵa túsemiz dep sheshtik jáne bireýimiz oqýǵa túse almasaq ekinshimiz de ol mamandyqtan bas tartamyz dep kelistik. Kishkentaı kezimizden bul bizdiń qaǵıdamyz, neni bolsyn birge isteımiz, - deıdi aǵaıyndylar.
16 maýsymnan bastap Kovalenkolar Petropavl qalalyq polıtsııa basqarmasynyń bólimshelerinde krımınalıst bolyp qyzmetke kiristi.
- Biz unatqan mamandyǵymyz boıynsha eńbek etip jatyrmyz, adamdarǵa kómektesý, qylmyskerlerdi áshkereleý, qoǵamdy qaýipsiz etý unaıdy jáne bir salada eńbek etip júrgenimizge qýanyshtymyz. Biz «kúsh – birlikte» degen sózdiń maǵynasyn jaqsy túsinemiz. Eger barlyǵy zańdy saqtaıtyn bolsa, biz birtutas ári myqty memleket bolamyz, - deıdi Nazar Kovalenko.
SQO polıtsııasynda eńbek etip júrgen egizderdiń ekinshi juby – kapıtan Lıdııa Logınova jáne leıtenant Nadejda Hlevova. Olar SQO PD arnaıy jáne mobılızatsııalyq daıyndyq basqarmasynda ınspektor bolyp jumys isteıdi.
Buǵan deıin SQO joldarynda «aqyldy» beınekameralar sany artqanyn jazǵan edik.
