SQO: polıtsııa qyzmetkerin qaǵyp ketken kólik júrgizýshisi tabylmaı jatyr

PETROPAVL. KAZINFORM – Soltústik Qazaqstan oblysyndaǵy respýblıkalyq mańyzy bar «Chelıabi-Novosibir» avtojolynda belgisiz bireý polıtsııa qyzmetkerin kólikpen qaǵyp ketip, oqıǵa ornynan izin jasyrǵan. 

SQO polıtsııa departamenti baspasóz qyzmetiniń málimetinshe, oqıǵa 28 sáýir kúni túnde bolǵan. Petropavl syrtynda polıtsııanyń 48 jastaǵy qyzmetkerin kólik soǵyp, saldarynan er adam alǵan jaraqattarynan sol jerde qaıtys boldy.

Kólik júrgizýshisi jol-kólik apaty bolǵan jerden qashyp ketken. Qazirgi ýaqytta jedel-izdestirý jumystary júrgizilip jatyr.

«Jol qozǵalysy nemese kólik quraldaryn basqaratyn adamdardyń kólik quraldaryn paıdalaný erejelerin buzý saldarynan abaısyzda adamnyń ólimine ákep soqtyrǵan fakti boıynsha qylmystyq is qozǵaldy», - delingen baspasóz qyzmeti taratqan habarlamada.

Buǵan deıin SQO-da jeke kúzet quramalarynyń kómegimen 6 qylmystyń ashylǵandyǵyn jazǵan edik.