SQO polıtseıleri Reseıde izdeýde júrgen 14 adamdy anyqtady
PETROPAVL. KAZINFORM – Jyl basynan beri Soltústik Qazaqstan oblysynyń polıtseıleri Reseıdiń kórshiles óńirlerinde túrli qylmys jasap, qashyp júrgen 14 kúdiktini ustaýǵa kómektesti.
SQO Polıtsııa departamenti baspasóz qyzmetiniń málimetinshe, óńir Reseı Federatsııasynyń úsh oblysymen shektesetindikten, qylmyspen kúreste shekara mańy yntymaqtastyǵynyń mańyzy zor.
Máselen, Omby oblysynda buryn urlyq jasaǵany úshin sottalǵan, qazirgi ýaqytta alaıaqtyq jasady degen kúdikke ilingen 34 jastaǵy petropavldyqtyń júrgen jeri anyqtaldy. Sondaı-aq Aqqaıyń aýdanynyń Kamyshlovo jáne Tıýmenka aýyldarynda eki jylqyny urlady dep kúdikke ilingen 41 jastaǵy er adam anyqtaldy. Qazirgi ýaqytta ol Reseı Federatsııasynda memlekettik shekarany zańsyz kesip ótkeni úshin jazasyn ótep jatyr.
Sondaı-aq soltústikqazaqstandyq tártip saqshylary reseılik áriptesteriniń kómegimen Petropavldaǵy sýpermarketterde birneshe ret urlyq jasady degen kúdikke ilingen 41 jastaǵy Qazaqstan azamatyn ustady. Qazir ol qamaýda otyr. Qazaqstanǵa ekstradıtsııalaý rásimi júrgizilip jatyr.
Oblystyń polıtseıleri de sheteldik áriptesterine Reseı aýmaǵynda jasalǵan qylmystar boıynsha izdeýde júrgenderdi anyqtaýǵa kómektesti. Olardyń qatarynda urlyq, esirtki ótkizý jáne qujattardy qoldan jasaý kúdigine ilingen adamdar bar.
Buǵan deıin Petropavlda 25 jyl jazasyn ótegen qylmysker áıelge shabýyl jasap, taǵy 9 jylǵa sottalǵanyn jazǵan edik.
