SQO polıtseıleri ınternet-alaıaqtyqtyń aldyn alý úshin jańa tásilge kóshti
ASTANA. KAZINFORM – SQO Aqqaıyń aýdany polıtsııa bóliminiń qyzmetkerleri turǵyndardy ınternet-alaıaqtyqtan saqtandyrý maqsatynda arnaıy eskertý habarlandyrý beınelengen polıetılen paketterdi satylymǵa shyǵardy.
Bul bastamany belsendi azamattyq ustanymy bar jergilikti jeke kásipker Sergeı Vekerle qolǵa aldy.
«Sońǵy ýaqytta joldastarymnan, tanystarymnan olarǵa alaıaqtardyń habarlasyp, kodtardy, paroldardy sondaı-aq jeke basqa qatysty ózge de derekterdi suraıtyny týraly jıi estımin. Sol sebepti bul usynysqa birden kelisimimdi berdim», — deıdi jeke kásipker.
Ol birden 30 myń paketke tapsyrys bergen. Paketterdiń syrtynda ınternet-alaıaqtyqtyń qaýpi týraly mańyzdy aqparat jazylǵan.
Osyndaı maqsatpen aýdandyq polıtsııa bóliminde ótken keńeste polıtseıler men prokýrorlar jergilikti bıznes ókilderimen kezdesý ótkizdi. Taýar paketteri aqqaıyńdyq ár dúkenge taralýy úshin jıyn qatysýshylary olardy ózindik qunymen kásipkerlik bólimi arqyly satyp alý týraly kelisimge keldi.
Bul jumystar kıberalaıaqtyqtarǵa qarsy is-qımylǵa baǵyttalǵan «Anti-Fraud» jedel-profılaktıkalyq is-sharasynyń sheńberinde ótkizilip otyr.
«Polıtsııa qyzmetkerleriniń profılaktıkalyq jumys júrgizýdegi maqsaty — aılakerlerdiń qýlyqtary men alaıaqtyqtyń qaýpi jaıly ár adamǵa aıtý. Bizdiń qyzmetkerler atalmysh aktsııalar kezinde, úıdi-úıge baryp, azamattardy qulaǵdar etedi. Aýyldyq okrýgterde WhatsApp messendjerindegi chattarda eskertýler jasalyp turady» — deıdi aýdandyq polıtsııa bóliminiń bastyǵy polıtsııa podpolkovnıgi Álnur Ahmedııarov.
Onyń aıtýynsha, jyl basynan aýdanda ınternet-alaıaqtyq faktileri tirkelmegen. Alaıda ótken jyly qaskóılerdiń ákki áreketiniń saldarynan 9 adam zardap shekse kerek. Atalǵan qylmystyń derliginde alaıaqtar ózderin «banktenbiz» dep tanystyrǵan.
Aýdandyq polıtsııa bóliminiń málimetinshe, turǵyndarǵa júzdegen myńnan 3,5 mıllıon teńgege deıingi shyǵyn kelgen. Sol sebepti jergilikti polıtsııa qyzmetkerleri qarjylyq máselelerdi telefon arqyly sheshpeý keregin eskertedi.
«Sondaı-aq áldebireýlerdiń qysym kórsetýimen nesıe almańyzdar, aqsha aýdarmańyzdar. Telefondaryńyzǵa beıtanys qosymshalardy ornatpańyzdar», – deıdi polıtsııa podpolkovnıgi Álnur Ahmedııarov.
