SQO polıtseıleri alıment tóleýden jaltarǵan 19 ákeni áshkereledi
PETROPAVL. KAZINFORM – Jyl basynan beri SQO Kóshi-qon qyzmeti alıment tólemeı qashyp júrgen 19 jaýapsyz ákeni izdep-taýyp, quzyrly organdarǵa tapsyrdy.
SQO PD baspasóz qyzmetiniń málimetinshe, bir jarym aıdyń ishinde Kóshi-qon qyzmeti bólimshelerinde aıyppul men alıment tóleýden jaltaryp júrgen boryshkerdi nemese týystyq baılanystaryn joǵaltqan 60 adam izdestirgen.
Týystyq baılanystardy joǵaltý jaǵdaılary kóbinese aqsha tabý úshin ketken boıy jaqyndarynan habar úzip qalatyn jaǵdaıda tirkeledi. Anasyna úsh aı boıy qońyraý shalmaǵan 27 jasar Soltústik Qazaqstan óńiriniń turǵyny habarsyz ketken. Kelip túsken ótinish negizinde polıtseıler aqparattyq esepke alý boıynsha tekserister júrgizip, barý yqtımal degen jerlerge izdestirý tapsyrmalaryn jibergen. Nátıjesinde azamattyń Almatyǵa jumys isteýge ketkeni anyqtalyp, bul týraly sheshesine dereý habarlandy.
Soltústik Qazaqstan oblysy polıtsııa departamenti kóshi-qon qyzmetiniń qyzmetkerleri 2019 jyldan beri 8 jáne 7 jastaǵy eki uly men qyzyn asyraýǵa alıment tóleýden jaltaryp júrgen turǵyndy izdep tapty. Tártip saqshylary onyń Aqmola oblysynyń Şýchınsk qalasynda ornalasqan jerin anyqtady. Materıaldar sot oryndaýshylaryna jiberildi.
«Sondaı-aq turaqty negizde kóshi-qon zańnamasyn saqtaý boıynsha jumys júrgizilip jatyr. Aıta ketý kerek, Qazaqstan Respýblıkasynda tirkeýsiz 30 kún júrýge ruqsat berilgen sheteldikter kelesi kúni qaıta tirkelýge bolady dep sanaıdy. Bul qate túsinik, sebebi erejeni buzǵanyna baılanysty sot sheshimine sáıkes eskertý jasaýǵa, aıyppul salýǵa nemese elden shyǵaryp jiberýge quqyly», — dep habarlady Soltústik Qazaqstan oblysy polıtsııa departamenti kóshi-qon qyzmeti basqarmasynyń bastyǵy polıtsııa polkovnıgi Talǵat Ábilov.
Jyl basynan beri kóshi-qon qyzmetiniń qyzmetkerleri zań buzǵan 69 sheteldikti, zańsyz jumysqa ornalastyrýdyń 7 faktisin anyqtady.
«Mundaı jaǵdaılardy anyqtaý maqsatynda sharýa jáne fermer qojalyqtaryna, aýyl sharýashylyǵy kásiporyndaryna, qurylys obektilerine, bazarlarǵa, vokzaldarǵa jáne basqa da zańsyz eńbek mıgranttary júrýi yqtımal jerlerge turaqty túrde tekserýler júrgiziledi. Sonymen qatar, Qazaqstannyń 23 azamaty úsh kúndik merzim ishinde polıtsııaǵa sheteldikterdiń kelgeni týraly habarlamaǵany úshin jaýapqa tartyldy» — delingen habarlamada.
