SQO polıtseıleri 9 jyl boıy izdeýde bolǵan qylmyskerdi Astanada ustady
PETROPAVL. KAZINFORM - Soltústik Qazaqstan oblysynda polıtseıler respýblıkalyq jedel-profılaktıkalyq is-sharanyń eki kúninde 16 qylmyskerdiń júrgen jerin anyqtady.
SQO Polıtsııa departamenti baspasóz qyzmetiniń málimetinshe, «Іzdestirý» is-sharasyna shamamen 250 polıtsııa qyzmetkeri jumyldyrylyp, 19 mobıldi top qurylys nysandaryn, hostelderdi, jaldamaly páterlerdi jáne izdeýde júrgen adamdar bolýy múmkin ózge de oryndardy tekserdi.
15 sáýir kúni keshke 15 jastaǵy jasóspirimniń joǵalǵany týraly habar tústi. Birneshe saǵattan keıin polıtseıler ony Petropavldaǵy saýda úıleriniń biriniń mańynan tapty.
Jasóspirimniń aıtýynsha, ol dostarymen birge spırttik ishimdik ishken. Buǵan deıin de birneshe ret úıinen ketip qalǵan, buzaqylyq pen urlyq úshin qylmystyq jaýapkershilikke tartylǵan. Kámeletke tolmaǵandar isteri jónindegi komıssııa qazirgi ýaqytta ony arnaıy oqý ornyna joldaý máselesin qarastyryp jatyr.
Sondaı-aq is-shara barysynda polıtseıler reseılik áriptesterimen ózara is-qımyldy kúsheıtti. Nátıjesinde Omby qalasynda Aqqaıyń aýdanynda mal urlady degen kúdikke ilingen azamat ustaldy.
Jalpy SQO aýmaǵynda eki kún ishinde 16 qylmyskerdiń júrgen jeri anyqtaldy, onyń ishinde 13-i TMD elderi boıynsha izdeýde bolǵan. Ustalǵandardyń qatarynda alaıaqtyq, urlyq, kólik aıdap áketý, para berý jáne ózge de qylmystar boıynsha sottalǵandar men kúdiktiler bar.
Máselen, polıtseıler 2016 jyly asa iri alaıaqtyq úshin 5 jylǵa bas bostandyǵy shektelgen 46 jastaǵy er adamnyń júrgen jerin anyqtady. Ol Astananyń eki turǵynyn aldap, birinen 900 myń teńge, ekinshisiniń páterin ıemdengen. Petropavl turǵyny 2017 jyly jazasyn óteýden jaltarǵan. Sodan beri polıtseıler ony izdestirýdi toqtatpaı, elordada ustady.
Buǵan deıin Gúlnár Sıqymbaevanyń joǵalyp ketken ulynyń denesi tabylǵanyn jazǵan edik.
