SQO polıtseıleri 4 táýlikte 1200 jol erejesin buzǵan júrgizýshilerdi anyqtady
PETROPAVL.KAZINFORM – Soltústik Qazaqstan oblysy polıtseıleri «Qaýipsiz jol» jedel aldyn alý is-sharasy aıasynda jol qozǵalysy erejelerin óreskel buzǵan júrgizýshilerdi anyqtady.
«Qaýipsiz jol» jedel aldyn alý is-sharasy 5 aqpan kúni bastalǵanyn jáne búkil Qazaqstanda ótip jatqanyn eske sala keteıik. 4 kúnniń ishinde oblysta 1282 túrli quqyq buzýshylyq anyqtaldy.
Tártip saqshylary mas kúıide kólik basqarǵan 14 júrgizýshini toqtatqan. Sońǵy oqıǵa – Ǵ.Músirepov atyndaǵy aýdanda tirkelgen. Qazaqstanda tirkelmegen, reseılik esepte turǵan «Mersedes» avtokóligin tizgindegen júrgizýshi aýdan ortalyǵyndaǵy kóshelerdiń birinde kózge túsken.
«Polıtsııa qyzmetkerleri sheteldik nómirleri bar avtokólikterge erekshe nazar aýdarady. Sebebi, tirkelmegen kólikti paıdalanýǵa tyıym salynady. Jedel aldyn alý is-sharasynyń 4 kúni ishinde zańmen belgilengen tártipte tirkelmegen kólik quraldaryn basqarýdyń 13 faktisi anyqtaldy» delingen SQO Polıtsııa departamenti taratqan aqparatta.
«Qaýipsiz jol» is-sharasy barysynda manevr jasaý erejelerin buzǵan 31 jaǵdaı anyqtaldy. Bul jol apatyn boldyrý yqtımaldyǵy joǵary bolǵandyqtan, óreskel ereje buzýǵa jatady. Ótken jyly manevr jasaý qaǵıdalaryn buzý boıynsha 39 jol kólik oqıǵasy tirkelip, saldarynan 9 kisi ajal qushyp, 60 adam túrli dene jaraqatyn alǵan.
«Jol kólik oqıǵalary aýyr saldarynyń yqtımaldyǵyn arttyratyn quqyq buzýshylyqtarǵa basa nazar aýdaramyz. Olarǵa, mysal retinde taǵylmaǵan qaýipsizdik beldikterin jatqyzýǵa bolady. 4 kún ishinde apattyq jaǵdaıda óziniń jáne jolaýshylardyń ómiri men densaýlyǵyna qaýip tóndirgen 163 júrgizýshi jaýapkershilikke tartyldy», - deıdi Soltústik Qazaqstan oblysy polıtsııa departamenti jergilikti polıtsııa qyzmeti basqarmasy bastyǵynyń orynbasary polıtsııa podpolkovnıgi Aleksandr Rozbah.
4 táýliktiń ishinde jyldamdyq rejımin buzǵan 238, jaıaý júrginshilerdi ótkizbegen 15, baǵdarshamnyń tyıym salatyn sıgnalyna ótý boıynsha 14 fakti anyqtaldy.
