SQO polıtsııasynda astananyń 70-ten astam «qurdasy» jumys isteıdi
PETROPAVL. QazAqparat – Soltústik Qazaqstan oblysynyń ishki ister organdarynda astananyń 72 qurdasy qyzmet atqarady, - dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jýyrda ǵana qyzmetke kirisken 23 jastaǵy polıtsııa qyzmetkerleri qazir tergeýshi, kınolog, jedel ýákilder bolyp eńbek jolyn bastady.
Polıtsııa serjanty Baqytjamal Kýtfenova Petropavl qalasy polıtsııa basqarmasy jedel basqarý ortalyǵynda «102» arnasynyń operatory bolyp jumys isteıdi. Ofıtser bolsam dep armandaıdy. Eńbek ótili bir jarym jyl ǵana.
Kún saıyn polıtsııaǵa ondaǵan adam júginedi. Kútpegen jaǵdaılar bolyp jatady, operator úshin eń bastysy – jedel kómek kórsetýdi saýatty uıymdastyrý.
«Keıde adamdardyń taǵdyry operatorlardyń jedel ári kásibı is-qımyldaryna táýeldi bolyp jatady. Birde áıel adam qońyraý shalyp, Petropavldaǵy bazarlardyń birindegi qyzmettik úı-jaıda kilttenip qalǵanyn aıtty. Ol jerge patrýldik polıtsııa batalonynyń qyzmetkerlerin jiberýge týra keldi», - deıdi Baqytjamal.
Jas astanada Baqytjamal alǵash ret jeti jasynda bolǵan. Ol saparynan esinde eshteńe qalmapty. Qazir jylda Nur-Sultan qalasyna barýdy ádetke aınadyrǵan. Barǵan saıyn ásem astananyń kórkem jerlerimen tanysady.
«Barlyǵyn astanamyzdyń kúnimen quttyqtaımyn. Jıyrma shaqty jyldyń ishinde adam tanymastaı bolyp ózgerdi. Kópqabatty záýlim úıler, keń kósheler, jol toraptary, neshe túrli áleýmettik nysan – turǵyndarǵa jaqsy jaǵdaı jasalǵan», - deıdi elorda «qurdasy» Baqytjamal.
