SQO polıtsııasynda 400-ge jýyq qyz-kelinshek qyzmet atqarady
PETROPAVL. QazAqparat – Soltústik Qazaqstan oblysy polıtsııa departamentinde 400-ge jýyq qyz-kelinshek eńbek etse, mereke qarsańynda olardyń 35-i marapatqa ıe boldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtsııa qatarynda erlermen birge pogon taqqan 374 áıel qyzmet atqarady. Onyń ishinde 14-i basshy laýazymynda. Budan basqa 94 ákimshilik memlekettik qyzmetshi áıel jáne 254 erikti jaldamaly quram eńbek etedi.
Polıtsııa departamenti jeke quramynyń erler qaýymy áriptesterin kele jatqan 8 naýryz merekesimen quttyqtady.
«Normalanbaǵan jumys kúni, táýliktik kezekshilik, jedel-izdestirý is-sharalary, patrýldeý men reıdter - áıelder jumysty erler qatarly minsiz oryndaıdy. Sondaı-yq, tolyq taldaýdy, uqyptylyqty, shydamdylyqty talap etetin jumysty atqarýda olardyń orny bólek. Ár áıel qyzmetkerdiń úlesi úlken ujymnyń san qyrly jumysynda joǵary baǵalanady», - dep atap ótti SQO PD bastyǵy Marat Tólebaev.
Marat Tólebaev 35 názik jandy qyzmetkerdi medaldarmen, gramotalarmen, tós belgilermen, alǵys hattarmen marapattady. «Quqyq tártibin qamtamasyz etýge qosqan úlesi úshin» medalimen SQO PD kóshi-qon qyzmeti basqarmasynyń aǵa ınspektory polıtsııa podpolkovnıgi Dınara Aıtqojına, QR ІІM Qurmet gramotasymen SQO PD emhanasy bar gospıtaldiń terapııa bólimshesiniń meńgerýshisi Elena Gofman marapattaldy. Sonymen qatar, SQO ákiminiń Qurmet gramotasymen SQO PD qarjymen qamtamasyz etý basqarmasynyń bas mamany Altynaı Qojabaevanyń eńbegi atap ótildi.
Marapattalǵandardyń qatarynda ishki ister organdarynyń ardager áıel qyzmetkerleri, ofıtserlerdiń zaıyptary, sondaı-aq qyzmettik mindetterin atqarý kezinde qaza tapqan qyzmetkerlerdiń jarlary boldy.
