SQO polıtsııasynda 18 ulttyń ókili qyzmet etedi
SQO Polıtsııa departamenti baspasóz qyzmetiniń málimetinshe, polıtsııa vedomstvosynda 18 ulttyń ókili jumys isteıdi. Olar negizinen kezinde týǵan jerlerinen kúshpen qonys aýdarylǵandardyń urpaqtary.
Alǵys aıtý kúnine oraı polıtsııa departamenti uıymdastyrǵan merekelik is-sharaǵa kelgenderdiń biri – Sadyq Allahveranov. Onyń ulty – ázerbaıjan. Sadyqtyń uly Eldar – polıtsııa qyzmetkeri.
«Atam molda bolǵan. Onyń bar dúnıe-múlkin tárkilep, Qazaqstanǵa bes balasymen jer aýdardy. Basynda elge kelgende jerkepede turdy. Qazaqtar olarmen barymen bólisip, kómektesti. Balalaryn qystan aýyrmaı-syrqamaı aman shyǵýy úshin ózderine aldy. Al kóktemde jer aýdarylǵandar úı sala bastady. Meniń áke-sheshem osy Qazaqstanda tanysyp, otbasyn qurdy», - deıdi Sadyq Allahveranov.
Eldar Allahveranov – ákesiniń maqtanyshy. Ol Qyzyljar aýdany Sokolovka eldi mekenindegi polıtsııa beketin basqarady. Polıtsııanyń bul bólimshesi naǵyz ınternatsıonal ujym – qazaq, ázerbaıjan, sheshen, nemis jáne orys birge eńbek etse, ótken aptada olardyń qataryna tatar jigiti qosyldy.
«Alǵys aıtý kúni – qazaqstandyqtardyń bir-birine meıirimdilik kórsetip, birligin pash etetin mereke. Bizdiń departamentte de bir shańyraqtyń balasyndaı 18 ulttyń ókili kelisim men yntymaqta qoıan-qoltyq jumys isteıdi. Bul merekeniń, ásirese jastar úshin tárbıelik mańyzy zor», - dedi SQO Polıtsııa departamentiniń basshysy Marat Tólebaev.
Bul kúni polıtsııa vedomstvosynyń qonaqtary belsendi ózara árekettestik, jas qyzmetkerlerdi tárbıeleýdegi kómek jáne ultaralyq qatynastardy nyǵaıtýda qosqan úlesteri úshin alǵys hattarmen marapattaldy.
