SQO polıtsııasynda 17 ult ókili jumys isteıdi
PETROPAVL. QazAqparat - Soltústik Qazaqstan oblysynyń ishki ister organdarynda 17 ulty ókili jumys isteıdi, dep habarlaıdy QazAqparat tilshisi.
Polıtsııa departamenti baspasóz qyzmetiniń aqparaty boıynsha, Qyzyljar aýdandyq polıtsııa bólimi Skolovka kenti polıtsııa bóliminiń ujymy ınternatsıonaldyq qarym-qatynastyń úlgisi bolyp otyr. 15 adamnan quralǵan shaǵyn ujymda qazaqtar, orystar, ázerbaıjan men sheshen jumys isteıdi. Bólim bastyǵy polıtsııa maıory Eldar Sokolovkada dúnıege kelip, sonda ósken. Tájirıbesi mol maman aýyldastary úshin jumys isteýde.
Birneshe aıdan beri jumys istep jatqan Tımırıazev polıtsııa bóliminiń leıtenanty Ilıa Djadýgashvılıdiń óndirisinde osy ýaqyt ishinde onnan astam qylmystyq is bolǵan. Qysqa ýaqyt ishinde ol aldanyp qalǵan ondaǵan adammen jumys istegen.
«Adamdarǵa urlanǵan zattaryn qaıtaryp berip jatqan kezde, olardy ádilettilikke sendirgen kezde jumystan lázzat alamyn. Ol adamnyń mártebesi, ulty, jasy mańyzdy emes. Qurmet pen yntymaqtastyq degenimiz osy», - dep esepteıdi polıtseı.
Baspasóz qyzmeti atap ótkendeı, ishki ister organdarynda qazaqtar, orystar, nemister, tatarlar, bashqurttar, ýkraınder, qyrǵyzdar, moldovandar, ázerbaıjandar, kárister, belorýster, grýzınder, polıaktar, ıngýshtar, armıandar, sheshender men grekter tatý-tátti jumys istep jatyr.
«Olardyń ortaq mindeti - azamattardyń qaýipsizdigin qamtamasyz etý. Birlik pen beıbitshilik - bizdiń basty baılyǵymyz, elimizdiń órkendeýiniń negizi. Osyndaı mańyzdy qundylyqtardy saqtaýda polıtsııa qyzmetkerleriniń róli zor. Polıtsııa ujymyndaǵy tatýlyq qarym-qatynas basqalarǵa da úlgi bolýy tıis dep oılaımyn», - dep atap ótti polıtsııa departamenti bastyǵynyń birinshi orynbasary Qaırat Orazalın.
Avtor: Olesıa Jýkoven
