SQO polıtsııasynda 100-den astam Táýelsizdik qurdastary eńbek etedi

PETROPAVL. QazAqparat – Soltústik Qazaqstan oblysy polıtsııa departamentinde Táýelsizdik alǵan jyly dúnıege kelgen 100-den astam ofıtser eńbek etedi, dep habarlaıdy QazAqparat tilshisi.

SQO PD baspasóz qyzmetiniń málimetinshe, Táýelsizdik alǵan jyly dúnıege kelgen 29 jastaǵy ofıtserler vedomstvonyń túrli bólimshelerinde eńbek etip júr. Olardyń arasynda tergeýshiler de, polıtsııanyń ýchaskelik ınspektorlary da, patrýldik polıtseıler de, jedel ýákilder de bar.

«Ata-anam meniń balalyq shaǵymdy jıi eske alyp, sol jyldary bastan keshirgen qıyndyqty únemi aıtyp otyrady. Eresekterdiń sózinen elimizdiń qıyndyq kórgenin, jyldar óte kele turmystyń tek jaqsarǵanyn bilemiz. Polıtsııada qyzmet etý meniń bala kezgi armanym edi. Bul jerde súıikti qyzmetimmen aınalysyp qana qoımaı, bilimimdi, biliktiligimdi arttyrýǵa múmkindik bar», - deıdi Shal aqyn aýdandyq polıtsııa bóliminiń aǵa tergeýshisi Samat Muqajanov.

Samat Shal aqyn aýdanyndaǵy Aqan-Baraq aýylynda dúnıege kelgen. Mektepti jaqsy bitirgen ol Qaraǵandydaǵy B.Beısenov atyndaǵy QR ІІM akademııasyna oqýǵa túsedi. 2013 jyly joǵary oqý ornyn támamdap, jas maman óziniń týǵan aýdanyna oraldy. Іshki ister organdarynda tergeýshi bolyp eńbek etip júrgenine 7 jyldan asqan.

«Jaqsy jaqqa ózgeristi meniń jumysymda da baıqaýǵa bolady. Eńbek etýge jaǵdaı jasalyp, zamanaýı kerek-jaraqpen jaraqtandyryldyq. Áleýmettik qoldaý bar», - deıdi polıtsııa kapıtany.

Samat Muqajanovtyń zaıyby mektepte muǵalim, tarıh páninen sabaq beredi. Úsh jasar qyzy bar jas otbasynyń bolashaqqa jospary kóp, olar erteńgi kúnine senimdi.