SQO Polıtsııa murajaıynda maıdangerdiń qoldan jasalǵan qasyǵy saqtaýly
Polıtsııa departamentiniń mýzeıindegi erekshe ekspozıtsııanyń biri – Uly Jeńiske arnalǵan. SQO ishki ister organdarynda ár jyldary 771 maıdanger qyzmet atqarǵan eken. Olardyń kópshiligi soǵystyń sarqynshaǵy – gımnasterkasyn, qarý men oq- dárilerin mýzeıge tapsyrǵan. Jádigerlerdiń ishinde ardagerlerdiń jeke zattary da bar. Kelýshilerdi ásirese osy buıymdar qatty qyzyqtyrady.
«Qujattar men sırek kezdesetin fotolardan basqa jaýyngerlerdiń maıdan dalasynda kúndelikti ustaǵan baqyrashtary, flıajkalary, tipti qasyqtary da bar. Solardyń biri – qoldan jasalǵan alıýmınıı qasyq. Bul qasyqty Brest qalasynyń túbindegi urystaǵy sırek demalystardyń birinde komandırine arnap jaýyngerlerdiń biri jasaǵan eken. Onyń erekshe yqylaspen jasalǵanyn kórýge bolady. Úıde kútip otyrǵan súıikti jaryna aman-esen oralýyna tilektestigin osylaı bildirgen», - deıdi SQO PD mýzeıiniń meńgerýshisi Lıýbov Osınskaıa.
Qasyqty mýzeıge ishki ister organdarynyń ardageri Aleksandr Ponýrovskıı syıǵa tartty. Aleksandr Frolovıch 1940 jyly ásker qataryna shaqyrylǵan. Batys maıdanda soǵysyp, 1942 jyly aýyr jaraqat alady. Emdelgennen keıin Brestti, Gomeldi alýǵa, Belorýssııany, Polshany, Shyǵys Germanııany azat etýge qatysady.
Elge aǵa leıtenant sheninde oralǵan jaýynger soǵystan keıingi jyldary mılıtsııa qatarynda qyzmet atqardy.
Baspasóz qyzmetiniń málimetinshe, búginde ishki ister organdarynda qyzmet etken 771 maıdangerdiń tek úsheýiniń ǵana kózi tiri. Jeńis kúni qarsańynda polıtsııa basshylyǵy men jeke quram olardyń árqaısysyna, sondaı-aq 14 tyl eńbekkeri men soǵys ardagerleriniń úsh jesiriniń úılerine quttyqtap barady.
