SQO polıtsııa gospıtalinde 22 medbıke 20 myń adamǵa qyzmet kórsetedi
PETROPAVL. QazAqparat – Soltústik Qazaqstan oblysyndaǵy Polıtsııa departamentiniń emhanasy men gospıtaline 20 myń adam tirkelgen. Olarǵa 22 medbıke qyzmet kórsetip keledi, dep habarlaıdy QazAqparat tilshisi.
Búgin aq halattylardy kásibı mereke - Halyqaralyq medbıkeler kúnimen tártip saqshylary jáne áriptesteri quttyqtady.
«Bıyl alǵash ret bul merekeni saltanatty is-sharasyz qarsy alyp jatyrmyz. Oǵan karantındik shekteýler sebep. Tótenshe jaǵdaı rejımi alynyp, karantındik shekteýler bosańsyǵanymen biz qyzmetkerlerimizdiń densaýlyǵyn qaterge tikpeýge sheshtik. Gospıtal men emhananyń mamandaryna onsyz da qaýipti indetti juqtyrý qaýpi basym. Qazir medbıkeler karantındik is-sharalarǵa jumyldyrylǵan. Olar ákimshlik ǵımarattardyń kireberisinde polıtsııanyń barlyq qyzmetkerlerin tekserýden ótkizip kirgizedi. Dárigerlermen birge syrqattardy, sonyń ishinde koronavırýs juqtyrýy múmkin naýqastardy qabyldap, tıisti saraptamalardy alady. Qazirgi kezde Polıtsııa departamentiniń jeke quramyn tekserip jatyrmyz. Sol sebepti baǵa jetpes qyzmetkerlerimizdi jumys oryndarynda quttyqtap jatyrmyz», - deıdi gospıtaldiń bastyǵy Qumar Kúsemisov.
Vedomstvonyń medıtsınalyq mekemesinde jumys isteıtin medbıkelerdiń jumysy kózge kórine bermeıdi. Olar oblystyń quqyq qorǵaý organdary salasynda isteıtinderdi, jaqyn týystaryn, ardagerlerdi qabyldap, qyzmet kórsetedi. Jalpy emhanaǵa 19 300 adam tirkelgen.
«Statsıonarda kezekshilik etemiz, shaqyrtýlar boıynsha shyǵamyz, karantındik is-sharalarǵa qatysamyz. Ardagerlerdi de nazardan tys qaldyrmaı, únemi baryp turamyz. Biraq eń basty qıyndyq jumystyń kóptigi emes. Bul jerge kelgende biz barlyq jeke máselelerimizdi, aýrýymyzdy syrtta qaldyrýymyz qajet. Naýqastardy aq nıetpen qabyldap, kásibı kómek kórsetýimiz kerek», - deıdi aǵa medbıke Janar Qusbekova.
