SQO polıtseıleri joǵalǵan maldy izdeýde kvadrokopterlerdi qoldandy
PETROPAVL. QazAqparat - SQO |ІІD-de ótken otyrysta polıtseıler men jergilikti basqarý ókilderi urlyqqa qarsy is-qımyl máselelerin talqylady, dep habarlaıdy «QazAqparat» HAA tilshisi.
ІІD baspasóz qyzmetiniń málimdeýinshe, óńirdegi jalpy qylmystyń 60 paıyzy osy urlyqtyń enshisinde. Oblysta tipti «2018-2020 jyldarǵa arnalǵan bótenniń múlkin urlaýǵa qarsy is-qımyl baǵdarlamasy» qurylǵan.
«Páter tonaý, uıaly telefon jáne mal urlyǵy kóp kezdesedi. Qaraýsyz maldyń jıi joǵalýy alańdatyp otyr»,-deıdi baspasóz qyzmeti.
Qazir jergilikti polıtseıler joǵalǵan maldy kvadrokopterlerdiń kómegimen izdeýde. Ýálıhanov aýdanynda joǵalǵan jylqy úsh táýlikten keıin tabyldy.
