SQO polıtseıleri jergilikti turǵynnan qoldan jasalǵan revolver aldy
PETROPAVL. QazAqparat - Soltústik Qazaqstan oblysynda polıtseıler buryn isti bolǵan turǵynnan qoldan jasalǵan revolver aldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, jedel-tergeý is-sharasy barysynda polıtseıler buryn jazasyn ótegen Petropavl qalasynyń 38 jastaǵy turǵynnan qoldan jasalǵan revolverdi tapty.
Kúdiktiniń aıtýynsha, ol qarýdy osydan 20 jyl buryn Aqqaıyń aýdany Qııaly eldi mekeninen taýyp alypty.
Saraptama qarýdyń nagannyń qosalqy bólshekterin qoldana otyryp toqsanynshy jyldary qoldan jasalǵanyn rastady. Kalıbri 5,6 mm revolver atýǵa jaramdy. Kúdiktige eshqaıda ketpeý jónindegi qolhat berildi.
«Tekseris barysynda qarýdyń esh qylmysqa qatysy joqtyǵy anyqtaldy. Eger de kúdikti aktsııa aıasynda bul revolverdi ózi ákelip tapsyrǵanda tirkelmegen qarýdy zańsyz saqtaǵany úshin qylmystyq jaýapkershilikten qutylyp, sondaı-aq, 70 myń teńge shamasynda syıaqy da alar edi», - deıdi SQO PD Krımınaldy polıtsııa basqarmasynyń bastyǵy Petr Klımov.
Mamandardyń aıtýynsha, óńirde zańsyz saqtalǵan eki qarý tabylyp, 12 kalıbrli 28 oq jáne ony daıyndaýǵa arnalǵan 3 kelilik dári men 1 keli bytyra alyndy.
