SQO polıtseıleri vedomstvolyq gospıtaldiń qyzmetkerlerin kásibı merekemen quttyqtady
PETROPAVL. QazAqparat - Soltústik Qazaqstan oblysynda Medıtsına qyzmetkerleri kúnin vedomstvolyq gospıtalderdiń dárigerleri de atap ótti. Aımaqtyq Polıtsııa departamentine qarasty emhana-gospıtalde qazirgi tańda 68 qyzmetker bar, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, óńir turǵyndarynyń tynyshtyǵyn 2000 tártip saqshysy kúzetse, polıtseılerdiń densaýlyǵy «SQO PD emhanasy men gospıtali» MM-niń 68 qyzmetkeriniń baqylaýynda.
Jalpy alǵanda gospıtal 20 myń adamǵa qyzmet kórsetedi, olar: polıtseılerden basqa, QR Ulttyq Ulany Áskerı ınstıtýtynyń jeke quramy, Tótenshe jaǵdaılar departamentiniń, prokýratýranyń, basqa da kúsh qurylymdarynyń qyzmetkerleri jáne olardyń otbasy músheleri.
Emhana bir kúnde 250 adamdy qabyldaı alady. Budan basqa 30 orynǵa shaqtalǵan statsıonar, bakterıologııalyq jáne klınıkalyq zerthanalar jumys isteıdi. Medıtsınalyq ortalyq qyzmetkerleri ishki ister organdary zeınetkerlerin nazardan tys qaldyrmaıdy, úılerine baryp, qajetti em-dom jasap, tekseristen ótkizip turady.
Merekege oraı departament basshysy Marat Tólebaev gospıtalǵa qajet baǵaly syılyqtar - turmystyq tehnıka tapsyrdy. 18 qyzmetker gramotalarmen jáne alǵys hattarmen marapattaldy. Qurmet kórsetilgenderdiń ishinde mekemeniń 6 ardageri, dárigerler, medbıkeler men sanıtarlar bar.
«Ardagerlerimiz ben qyzmetkerlerimizdiń densaýlyǵy úshin jasap jatqan qyzmetterińizdi baǵalaımyz. Sizder adamǵa berilgen eń úlken baılyq - ómir men densaýlyqty kúzetesizder, saqtaısyzdar. Árqaısymyzdyń sizderge degen alǵysymyz sheksiz. Ózderińizdiń kúndelikti eńbekterińizben qoshemet-qurmetke laıyqsyzdar», - dedi Marat Tólebaev.
Kesh Polıtsııa departamentiniń vokaldy tobynyń kontsertine ulasty.
