SQO polıtseıleri úsh elikti zańsyz atqan kúdiktini ustady
PETROPAVL. QazAqparat - Soltústik Qazaqstan oblysynda úsh elikti ruqsatsyz atqan kúdikti ustaldy. Qyzyljar aýdanynyń 33 jastaǵy turǵyny zańsyz ań aýlaǵany úshin endi 40 táýlikke deıin qamalýy múmkin, dep habarlaıdy QazAqparat tilshisi.
SQO PD baspasóz qyzmetiniń habarlaýynsha, tabıǵatty qorǵaý polıtsııasy qyzmetkerleri reıdtik is-sharalar kezinde Smırnovo memlekettik tabıǵı qoryǵynyń aýmaǵynda aǵash arasyndaǵy alańqaıda jańa ǵana múshelengen 3 eliktiń etin tapqan. Oqıǵa ornynan zattaı aıǵaqtar alyndy.
Jedel-izdestirý barysynda Qyzyljar aýdanynda ýchaskelik ınspektor nómirlik belgisi men tirkeý qujattary joq qarda júrgish tehnıkamen kele jatqan 1986 jyly týǵan turǵyndy toqtatqan. Tergeý barysynda zańsyz ańshylyq jasaý faktisiniń barlyq mán-jaıy anyqtalady. Qarda júrgish tehnıka alyndy.
«Bıyl zańsyz ań aýlaýdyńekinshi faktisi tirkeldi. Alǵashqysy da Qyzyljar aýdanynda boldy,ol kezde bir elik zańsyz aýlanǵan bolatyn», - deıdi SQO PD JPQB tabıǵatty qorǵaý polıtsııasy bóliminiń bastyǵy Sergeı Lıpko.
Atalǵan fakti QR QQ 337-baby 1-bóligi «Zańsyz ańshylyq» boıynsha Sotqa deıingi tergep-tekserýdiń biryńǵaı tizilimine engizildi. Bul bap boıynsha 160 aılyq eseptik kórsetkishke deıin aıyppul salý nemese 40 táýlikke deıin qamaýǵa alý túrindegi jaza qoldanylady.
Mamandardyń esebinshe, memleketke keltirilgen shyǵyn somasy 5 mln 680 myń teńgeni qurap otyr.
