SQO polıtseıleri tórt kúnde 74 keli esirtki tárkiledi
SQO polıtsııa departamenti baspasóz qyzmetiniń málimetinshe, aktsııa barysynda esirtki, psıhotropty zattar men olardyń prekýrsorlary paılanylatyn obektiler: aýrýhanalar, qoımalar, óndiristik kásiporyndar tekserildi.
Oblystyń eki medıtsına mekemesinde esirtki quraldaryn saqtaý erejesiniń buzylǵandyǵy jáne olardy saqtaýǵa arnalǵan bólmelerdiń talapqa saı emestigi anyqtaldy. Esirtki jáne psıhotropty zattary bar 55 ampýla alyndy.
«Jaýapty tulǵalarǵa qatysty ákimshilik hattamalar toltyryldy, buzýshylyqtardy joıý maqsatynda materıaldar jaýapty ınstatsııalarǵa tapsyryldy. Sondaı-aq, jedel-profılaktıkalyq is-sharasy kezinde kúndelikti jumystyń basty baǵyttary kúsheıtildi. Jedel aqparatty tekserý nátıjesinde 3 esirtki qylmysy anyqtaldy», - dedi SQO Polıtsııa departamenti Esirtki qylmysyna qarsy is-qımyl basqarmasynyń bastyǵy Jandos Basybaev.
Aýdan ortalyǵy Mamlıýtkanyń 49 jastaǵy turǵynynyń baqshasynda jáne qora-qopsysynda keptirilgen marıhýana japyraqtary, sondaı-aq asa iri kólemde esirtki salynǵan qorap jáne paketter tabyldy. Jalpy salmaǵy 5 kg 300 gramm.
Al Býlaev qalasynyń 44 jastaǵy turǵyny marıhýana egýmen aınalysqan. Odan baqshasynda ósirilgen, jalpy salmaǵy 61 kg bolatyn 12 qap keptirilmegen marıhýana alyndy. QR QK 300-baby «Quramynda esirtki zattar bar, ósirýge tyıym salynǵan ósimdikterdi zańsyz egip-ósirý» boıynsha sotqa deıingi tergeý júrgizilýde.
Budan bólek Petropavlda jedel ýákilder ózimen birge 5 gramnan artyq «tuz» degen atpen keń taralǵan sıntetıkalyq esirtki zaty bolǵan 31 jastaǵy astana turǵynyn ustady. Kúdiktiniń aıtýynsha, nasha oǵan jeke paıdalanýǵa qajet bolǵan. Qazir osy qylmysqa qatysty sotqa deıingi tergeý júrgizilýde.
Mamandardyń málimetinshe, jedel-profılaktıkalyq is-shara barysynda 11 esirtki qylmysy anyqtalǵan, 74 keli 181 gramm túrli esirtki alyndy.