SQO polıtseıleri tórt kúnde 32 mas júrgizýshini ustady
PETROPAVL. QazAqparat – Soltústik Qazaqstan oblysynda polıtseıler «Mas júrgizýshi» jedel-profılaktıkalyq is-sharasyn qorytyndylady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 24-27 maýsym aralyǵynda óńirde kólikti mas kúıde basqarý faktilerin boldyrmaý maqsatynda «Mas júrgizýshi» jedel-profılaktıkalyq is-sharasy ótti.
27 maýsym kúni keshke Petropavlda Brýsılovskıı jáne Gogol kósheleriniń qıylysynda «Mitsubishi Galant» avtomashınasyn basqarǵan 52 jastaǵy qala turǵyny ustaldy. Er adamnan alkogol ıisi sezilgen, tili kúrmelip, sóıleı almaǵan. Kólikte bir bótelke spırttik ishimdik bolǵan.
Medıtsınalyq kýálandyrý alkogoldik masaıýdy kórsetti.
2017 jyly qala turǵyny mas kúıde kólik basqarǵany úshin basqarý quqyǵynan 3 jylǵa aıyrylǵan. Jazasynyń merzimi ótkenimen, er adam júrgizýshi kýáligin qaıtarýǵa asyqpaǵan. Oǵan qatysty QR Ákimshilik quqyq buzýshylyq týraly kodeksiniń 608-baby 6-bóligi «basqarý quqyǵy joq tulǵanyń kólik quralyn mas kúıde basqarý» boıynsha materıal jınaldy. Sot sheshimimen qala turǵynyn 20 táýlikke ákimshilik qamaýǵa alý jazasy taǵaıyndaldy.
«Jedel-profılaktıkalyq is-sharanyń 4 kúninde oblys joldarynda 32 mas júrgizýshi ustaldy. Bundaı jaǵdaıdyń árqaısy – jol qozǵalysyna qatysýshylar úshin asa qaýipti. Spırttik ishimdik iship, rólge otyrǵany úshin ákimshilik qamaýdan bólek, 7 jylǵa júrgizý quqyǵynan aıyrý kózdelgen», - dedi SQO polıtsııa departamenti jergilikti polıtsııa qyzmeti basqarmasynyń bastyǵy Aıdyn Baımatov.
Budan bólek, polıtseıler kólikti basqarý quqyǵynsyz júrgizgen 47 adamdy jaýapqa tartty. 169 júrgizýshi jyldamdyq rejımin buzǵan, 55-si jaıaý júrginshilerge jol bermegen.
Jalpy jedel-profılaktıkalyq is-shara kezinde jol qozǵalysy erejelerin buzýdyń 2 myńǵa jýyq deregi anyqtaldy.
