SQO polıtseıleri tonnaǵa jaqyn spırttik ónimdi zańsyz aınalymnan aldy
PETROPAVL. QazAqparat – Soltústik Qazaqstan oblysynda reıd barysynda polıtseıler tonnaǵa jaqyn spırttik ónimdi zańsyz áketip bara jatqan kóliktiń jolyn kesti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, oqıǵa túngi saǵat 02:30-dar shamasynda Ǵabıt Músirepov aýdanyndaǵy Rýzaevka-Vozvyshenka avtojolynda bolǵan. Reıdtik shara barysynda patrýldik polıtseıler GAZ-330210 kóligin toqtatady. Rólde Kókshetaý qalasynyń 26 jastaǵy turǵyny bolǵan.
Avtokólikti tekserý barysynda odan 5 lıtrlik plastık bótelkelerge quıylǵan 900 lıtr spırttik ónim tabyldy. Polıtseılerdiń aıtýynsha, júrgizýshi ilespe júk qujattaryn kórsete almaǵan.
Zańsyz ónim tárkilenip, saraptamaǵa jiberildi. Qorytyndysy boıynsha protsessýaldy sheshim qabyldanbaq.
«Alkogol ónimderin satý barysynda kóptegen zańbuzýshylyqtarǵa jol beriledi. Eń jıi kezdesetini – 21 jasqa tolmaǵandarǵa jáne 23.00-den keıin ishimdik satý. Sondaı-aq spırttik ónimderdi belgilengen baǵadan tómen satqan derekter anyqtaldy. Baǵasy tómen bolsa, onyń qoldan jasalǵany anyq. Jyl basynan osyndaı zańbuzýshylyqtarǵa jol bergeni úshin jáne alkogoldi tıisti qujattarsyz satqany úshin aýdanda 12 adam ákimshilik jaýapqa tartyldy. 177 lıtr bolatyn 369 shólmek spırttik ónim aınalymnan alyndy», - deıdi Ǵ.Músirepov aýdany polıtsııa bóliminiń bastyǵy Aıdos Ydyrysov.
Jalpy SQO boıynsha jyl basynan spırttik ishimdikterdi satýda 218 zańbuzýshylyq tirkelgen. Onyń 136 deregi zańsyz saýdaǵa qatysty. Nátıjesinde 615 lıtr ónim aınalymnan alyndy.
