SQO polıtseıleri ótken jyly 6 myńnan astam krımınaldyq zertteý júrgizgen
ASTANA. QazAqparat - 2018 jyly krımınaldyq polıtsııa qyzmetkerleri 14 447 jedel-izdestirý is-sharasy men tergeý áreketterine qatysyp, odan bólek 6 205 krımınaldyq zertteý júrgizdi. Soltústik Qazaqstan oblystyq Polıtsııa departamenti Feısbýktegi paraqshsynda málim etti, dep habarlaıdy QazAqparat.
Habarlamada kórsetilgendeı SQO Polıtsııa departamentiniń Jedel krımınalıstıka bóliminiń bastyǵy, polıtsııa polkovnıgi Igor Semenovtyń málimetinshe, ótken jyly krımınaldyq polıtsııa qyzmetkerleri oqıǵa ornyna 4,5 myńnan astam ret shaqyrylyp, nátıjesinde 2533 qol izi, 2040 trasologııalyq, 207 odorologııalyq iz jáne 287 mıkrobólshek alyndy.
Onyń aıtýynsha, krımınaldyq isti qaraýda barlyq iz túrleri, kólik jáne buzý quraldary muqııat zertteledi.
«Birde qylmyskerdi jerde qalǵan tizesiniń, ıaǵnı matanyń izi boıynsha kúdiktiniń shalbarynyń matasymen sáıkestendirý arqyly anyqtaý múmkin boldy. Kóbinese aıaq kıim izderimen jumys isteımiz. Mysaly, aıaq kıim izderi vokzal aýdanynda jáne Jumysshy kentinde jasalǵan birneshe urlyqqa qatysy bar 30 jasar qala turǵynyn anyqtaýǵa septigin tıgizdi. Budan buryn uqsas qylmystar úshin sottalǵan qaskóı jer úılerge kirip, aqshany qoldy qylǵan. Ol QR QK 188-baby 2-bólimi «Urlyq» jasaý boıynsha sottaldy. Onyń aıaq kıiminiń izderi eń mańyzdy dálelderdiń biri boldy»- deıdi I. Semenov.
Málimdemede aıtylǵandaı, 2018 jyly SQO PD krımınalısteri 14 447 jedel-izdestirý is-sharalary men tergeý áreketterine qatysty. Odan bólek, 6205 krımınaldyq zertteý men 5695 tekseris júrgizgen, sol sııaqty 474 fotorobot jasady.
