SQO polıtseıleri oqýshylarǵa jol retteýshisiniń belgilerin úıretip jatyr
SQO Polıtsııa departamenti baspasóz qyzmetiniń málimetinshe, kóktemgi demalys jáne jaz mezgili qarsańynda óńirde Іshki ister mınıstrliginiń bastamasymen «Bala jáne baǵdarsham» respýblıkalyq aktsııasy ótip jatyr. Іs-shara aıasynda polıtseıler balalar men olardyń ata-analarymen jol qozǵalysyn túsindirý boıynsha jumystar atqaryp jatyr.
Oǵan sebep te joq emes. SQO-da sońǵy eki aıda balalardyń qatysýymen 5 jol-kólik oqıǵasy tirkelip, saldarynan bir bala mert boldy, beseýi jaraqat aldy.
Petropavldaǵy № 17 orta mekteptiń 5-synyp oqýshylary aktsııa aıasynda polıtsııa retteýshisiniń qımyldaryn túsinip úırendi.
Jergilikti polıtsııa qyzmeti basqarmasynyń ınspektory Jangeldi Qorjybaev balalarǵa jol qozǵalysyn qamtamasyz etýdiń negizgi erejeleri týraly túsinikti etip aıtyp berdi.
Sondaı-aq kezdesý barysynda oqýshylarǵa túngi ýaqytta ata-ana qaraýynsyz kóshede jalǵyz júrýge bolmaıtyndyǵy, usaq buzaqylyq úshin qandaı jaza qarastyrylǵany aıtyldy.
«Kúnniń jylýymen kóshedegi kólik aǵyny arta túspek, al, kóktemgi, jazǵy demalysta aýlalar men joldarǵa balalar shyǵady. Jol-kólik oqıǵalarynyń aldyn alý maqsatynda biz ustazdarmen birge osyndaı profılaktıkalyq is-sharalardy ótkizemiz. Baıqaǵanymyz, tek balalar ǵana emes, eresekter de jolda kútpegen minez tanytyp, jol erejesin buzady. Sondyqtan ata-analardy balalaryna úlgi bolyp, jol tártibin saqtaýdy shaqyramyz», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Jalpy, jyl basynan beri oblysta 33 jol-kólik oqıǵasy tirkeldi, saldarynan 3 adam qaza taýyp, 62 adam jaraqat aldy.
