SQO polıtseıleri mas kúıde rýlge otyrǵan 111 júrgizýshini anyqtady
PETROPAVL. QazAqparat – Soltústik Qazaqstan oblysynda jyl basynan mas kúıde kólikke otyrǵan júrgizýshilerdiń kinásinen bir adam qaza bolyp, taǵy bireýi jaraqattandy, dep habarlaıdy QazAqparat tilshisi.
SQO Polıtsııa departamenti baspasóz qyzmetinen málim etkendeı, mas kúıde rýlge otyrýdyń saldarynan taǵy alty jaǵdaıda densaýlyqqa zııan jáne materıaldyq shyǵyn keldi.
Petropavl qalasynyń 1986 jyly týǵan turǵyny 14 naýryz kúni «Subary Legacy» avtomashınasymen qaladaǵy ortalyq kóshelerdiń birindegi shamǵa zaqym keltirdi. Medıtsınalyq kýálandyrý kezinde onyń alkogoldik ishimdik ishkeni anyqtaldy. Úsh kún ótken soń Petropavl qalalyq mamandandyrylǵan ákimshilik soty ony 20 táýlikke ákimshilik qamaqqa alýǵa sheshim qabyldady. Budan bólek ol aldaǵy 7 jyl rýlge otyra almaıdy.
«Basqarý quqyǵynan endi 7 jyldan 9 jylǵa deıin aıyrylady. Budan basqa quqyq buzýshylyqtyń aýyrlyǵyna qaraı 15 táýlikten 25 táýlikke deıin ákimshilik qamaýǵa alynady. Jaza balamasyz, ıaǵnı jaýapkershiliktiń basqa túrlerine almastyrylmaıdy», - deıdi SQO PD Ákimshilik polıtsııa basqarmasynyń bastyǵy Jasulan Ospanov.
Jyl basynan QR Ákimshilik quqyq buzýshylyq kodeksiniń 608-baby «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» boıynsha 111 hattama, onyń 48-i Petropavlda toltyryldy. Polıtseıler 104 fakti boıynsha materıaldardy sotqa joldady.
