SQO polıtseıleri kópbalaly 30 shaqty otbasyǵa kómek kórsetti
SQO PD baspasóz qyzmetiniń habarlaýynsha, «Jasylyq jasa» qaıyrymdylyq sharasy 18-28 aqpan aralyǵynda ótti.
Alǵashqylardyń biri bolyp aktsııaǵa oblystyq Polıtsııa departamenti jyldam áreket etetin arnaıy jasaǵynyń ınspektorlary qosyldy. Olar Petropavl qalasy, Komsomolskaıa kóshesinde jer úıde turatyn jalǵyzbasty zeınetker áıelge kómek kórsetý týraly biraýyzdan sheshim qabyldaǵan. Arnaıy jasaqtyń ınspektory Rınat Rahımovtiń aıtýynsha, oǵan kórshiles ornalasqan úıde 63 jastaǵy zeınetker turady eken. Sońǵy kúnderi qardyń kóp túskenin kórip, ınspektor óziniń áriptesterin kómekke shaqyrypty. Olar qýana kelisip, aınalasy bir-eki saǵattyń ishinde zeınetkerdiń aýlasyn qardan tazartyp tastady.
Oblystyq Polıtsııa departamenti Arnaıy daıarlyq basqarmasynyń qyzmetkerleri Pobeda kóshesindegi bir bólmeli páterde turyp jatqan otbasy múshelerine kómektesti. Otaǵasy Manap Serikbaev jalǵyz ózi tórt balany tárbılep otyr. Ofıtserler azyq-túlik pen basqa da qajetti zattar ákelip, balalardy qýantty.
Ákimshilik polıtsııa basqarmasynyń ofıtserleri de aktsııadan qalys qalmaı, Petropavl qalasynda turatyn Maqashevtar otbasyna azyq-túlik apardy. Bul otbasyda alty bala tárbıelenýde. Al, jergilikti polıtsııa qyzmeti basqarmasyndaǵy áriptesteri Oıqala aýdanynda turatyn Pıpýstardyń otbasyna bardy. Saqshylar balalarǵa kıim-keshek, azyq-túlik, otyn ákeldi. Tatıana Pıpýs otaǵasy ekeýi jeti bala tárbıelep otyr. Úlkenderi - 15-te, múgedek, al eń kishkentaılary - 6 aılyq eken.
«Polıtsııa departamentiniń qyzmetkerlerine alǵysym sheksiz. Bul biz úshin úlken kómek», - deıdi Tatıana.
Jalpy, óńirdiń tártip saqshylary 11 kúnde 31 muqtaj otbasyǵa kómek kórsetti. Aktsııa barysynda ınternatta turyp jatqan balalar da nazardan tys qalmady.
SQO PD bastyǵynyń orynbasary Qapez Dáýletbaev aıtyp ótkendeı, qaıyrymdylyq aktsııasy bir rettik shara emes. Polıtsııa departamenti kómekke muqtaj otbasylarǵa kómek kórsetý maqsatynda aýqymdy jumystardy josparlaǵan.
