SQO polıtseıleri kóligimen jolda qalǵan Túrkııa azamatyna kómektesti
PETROPAVL. QazAqparat – Soltústik Qazaqstan oblysynda eline zyǵyr apara jatqan Túrkııa azamaty júk kóligimen jolda qaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, patrýldik polıtsııa batalonynyń qyzmetkerleri Mamlıýtka-Qostanaı tasjolynyń Jambyl aýdany ortalyǵy Presnovka janynda jol jıeginde turǵan «Volvo» aýyr júk kóligin baıqaıdy.
Júrgizýshi Túrkııa azamaty telefonyndaǵy onlaın-aýdarmashynyń kómegimen tildesken. Júk kóliginiń júrgizýshisi otanyna Petropavldan 20 tonna zyǵyr apara jatqanyn túsindirgen. Jolda kóliktiń aýa súzgisi isten shyqqan. Aıazda ne isterin bilmeı turǵanda polıtseıler kómekke kelgen. Olar bólshekti sýretke túsirip, Petropavldaǵy tanystaryna joldaıdy. Olar taksı júrgizýshisinen jańa súzgini berip jibergen.
Túrkııa azamatyn polıtseılerdiń ótinishi boıynsha oqıǵa ornyna kelgen TJ qyzmetkerleri qonaq úıge apardy, al tártip saqshylary túni boıy júk kóligin kúzetti. Kelesi kúni tańerteń sheteldikke kóligin jóndeýge kómektesti.
«Men qansha jolda júrsem de, mundaı polıtsııa qyzmetkerlerin eshqashan kezdestirmedim, tez kómekke keledi dep kútpegen de edim. Sheksiz alǵys bildiremin!» - dedi jolyn jalǵastyrǵan sheteldik.
