SQO polıtseıleri qarttardy aldaǵan alaıaqty quryqtady
ASTANA. QazAqparat - Petropavl qalasynyń polıtsııa qyzmetkerleri bir aı buryn ǵana túrmeden bosap shyǵyp, «eski ánine» qaıta basqan alaıaq áıeldi ustady, dep habarlaıdy «QazAqparat» HAA tilshisi.
Bul týraly SQO ІІD baspasóz qyzmeti habarlady.
«Shilde aıynda zeınetkerlerdiń senimine kirip, aqshalaryn ıemdenip ketip júrgen bir áıel týraly aryzdar kelip túse bastady. Alaıaq áıel jasy egde adamdardyń kórshisi bolyp tanysyp, «sańyraýqulaq satyp alýǵa» nemese «qubyr jóndeýge» qaryzǵa aqsha surap alyp júrgen. Alaıaqtyń sońǵy qurbany 80 jastaǵy zeınetker áje boldy. Tergeýshilerge alaıaqtyqtyń bul ádisi tanys edi. Jedel izdestirý sharalary barysynda kúdik rastalyp, 35 jastaǵy buryn da osyǵan uqsas qylmysqa qatysy bar áıel ustaldy», - dep habarlaıdy SQO baspasóz qyzmetinen.
Petropavl qalasy ІІB bastyǵynyń birinshi orynbasary Asan Meıramovtyń aıtýynsha, qazirgi ýaqytta ustalǵan áıeldiń ózge de qylmystarǵa qatysy bar-joǵy anyqtalyp jatyr. QR QK 190-baby 2-bóligi boıynsha sotaldy tergeý amaldary bastaldy. Kúdiktiniń qylmysy dáleldengen jaǵdaıda 4 jylǵa deıin bas bostandyǵynan aıyrylýy múmkin.
SQO ІІD baspasóz qyzmetinen qosyp ótkendeı, alaıaqtyq jaǵdaıy SQO-da azaıǵanymen, eń kóp kezdesetin qylmystardyń aldynda tur. Alǵashqy jartyjyldyqta atalǵan óńirde alaıaqtyqqa qatysty 112 jaǵdaı tirkelgen.
