SQO polıtseıleri izdeýdegi 47 qylmyskerdi ustady
PETROPAVL. QazAqparat – Soltústik Qazaqstan oblysynda 81 qylmysker buryn jasaǵan qylmysy úshin izdelse, onyń 47-si jyl basynan qolǵa tústi, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń habarlaýynsha, izdeýdegilerdiń negizgi bóligi probatsııalyq baqylaý jáne merziminen buryn bosatý sharttaryn buzǵandar.
Petropavl qalalyq Polıtsııa basqarmasy krımınaldyq polıtsııa bóliminiń jedel ýákilderi kisi tonap, urlyq jasaǵan kúdikti, oblys ortalyǵynyń buryn sottalǵan 28 jastaǵy turǵynyn Reseı aýmaǵynda anyqtap, ustady. Kúdiktiniń kezdeısoq tabys tabý úshin Reseıdiń biraz qalalaryn sharlaýy tártip saqshylaryna qıyndyq týǵyzdy.
Ol alǵashynda Omby qalasyna bet alyp, odan ári Túmen, Ekaterınbýrg, Ijevsk qalalarynan biraq shyqqan. Ýdmýrtııanyń astanasynda petropavldyq jedel ýákilder ony Máskeýge bet alǵan jerinen qolǵa túsirdi. Polıtseılerdiń izine túskenin sezgen ol, shatastyrý maqsatynda osylaısha «saıahattaǵan». Qazirgi ýaqytta kúdikti Ijevsk ІІMB ýaqytsha ustaý ızolıatorynda qamaýda otyr, keıin Qazaqstanǵa ekstradıtsııalanady.
«Buryn jasalǵan qylmystardy ashý, qylmyskerler men habar-osharsyz ketken azamattardy izdestirý toqtaýsyz júrgiziledi. Kóbine, aılar boıǵy jan-jaqty eńbektiń arqasynda ǵana izdeýdegi adamnyń júrgen jerin anyqtaý múmkin bolady», - deıdi SQO PD Krımınaldyq polıtsııa basqarmasynyń bastyǵy Petr Klımov.
Krımınaldyq polıtsııa basqarmasynyń málimetinshe, búgingi kúni 34 qylmysker izdeýde. Sondaı-aq, jedel ýákilder bıylǵy jyly habar-osharsyz ketken 31 adamnyń júrgen jerin anyqtaǵan.
