SQO polıtseıleri iz-túzsiz joǵalǵan jigitti Máskeýden tapty
PETROPAVL. QazAqparat - Soltústik Qazaqstan oblysynyń polıtsııa qyzmetkerleri joǵalyp ketken 30 jastaǵy jigitti Máskeýden taýyp aldy, dep habarlaıdy QazAqparat tilshisi SQO polıtsııa departamentiniń baspasóz qyzmetine silteme jasap.
Quzyrly organnyń habarlaýynsha, Mámlút aýdanynda úı ishimen ursysyp qalǵan jas jigit aıaq astynan joq bolyp ketken. Alasuryp ulyn izdegen anasy polıtsııaǵa júgingen. Tergeýdi bastaǵan polıtsııa qyzmetkerleri 30 jastaǵy jigittiń Reseı shekarasyna ótip ketkenin anyqtaıdy. Alaıda, arada birshama ýaqyt ótse de, ókpeshil ul úı-ishine habarlaspaı qoıǵan.
«Soltústik Qazaqstannyń quqyq qorǵaýshylary reseılik áriptesterinen kómek surady. Sáýir aıynda tártip saqshylary onyń Máskeýde júrgenin anyqtaǵanymen, týǵan-týystaryna bul týraly habarlaýǵa erterek edi. Qazaqstandyq jigit Máskeýde jumysqa turyp, týystaryna habar berýge asyqpaǵan kórinedi. Jerles polıtsııa qyzmetkerlerimen kezdeskennen keıin ǵana anasyna qońyraý shalyp, jaǵdaıy jaqsy ekenin eskertken», - delingen habarlamada.
Ulynyń tabylǵanyna qýanǵan Galına Bolotashvılı quqyq qorǵaýshylarǵa alǵysyn jaýdyryp jatyr.
«Qylmyskerlerdi nemese habarsyz ketkenderdi izdestirý - polıtseıler jumysynyń basty baǵyttarynyń biri. Árbir osyndaı jaǵdaıdyń artynda túrli taǵdyrlar tur. Quqyq qorǵaýshylardyń mindeti - osyndaı qıyndyqqa tap bolǵan adamdarǵa kómektesý», - deıdi SQO PD bastyǵy polıtsııa general-maıory Berik Bilálov.
