SQO polıtseıleri ishimdik ishkenderge qarý qoldanýǵa májbúr boldy

PETROPAVL. QazAqparat – Soltústik Qazaqstan oblysy Mamlıýtka qalasynyń 3 turǵyny polıtseılerge baǵynbaı, olarǵa judyryq ala júgirgen. Tártip saqshylary qarý qoldanýǵa májbúr boldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, oqıǵa 12 naýryzda keshqurym Mamlıýt aýdanynyń ortalyǵy Mamlıýtka qalasynda bolǵan. Patrýldeýge shyqqan ýchaskelik polıtsııa ınspektorlary kópqabatty úılerdiń aýlalarynyń birinde jınalyp, spırttik ishimdik iship otyrǵan topty baıqaǵan.

Qoǵamdyq tártipti buzǵandyǵy jónindegi polıtseılerdiń eskertpesin olar agressııamen qabyldap, bılik ókilderine kúsh kórsetken.

Polıtsııa qyzmetkerleriniń biri «Quqyq qorǵaý qyzmeti týraly» zańǵa sáıkes qyzmettik qarýmen aldymen aspanǵa atyp,nátıje bermegennen keıin qoldanýǵa májbúr bolǵan.

Quqyq buzýshylardyń ekeýi medıtsınalyq kómekke júgindi, alaıda olardy aýrýhanaǵa jatqyzýdyń qajeti bolmady.

«Qazirgi ýaqytta úsh kúdikti – 38, 27 jáne 20 jastaǵy jergilikti turǵyndar ýaqytsha ustaý ızolıatoryna qamaldy. Bul oqıǵa QR Qylmystyq kodeksiniń 380-baby, 4-bóligi «Bılik ókiline qatysty qorqytý nemese kúsh kórsetý» boıynsha Sotqa deıingi tergep-tekserýlerdiń biryńǵaı tizilimine engizildi. Qylmystyń bul túrine 7 jylǵa deıin bas bostandyǵynan aıyrý jazasy qarastyrylǵan. Tergeý amaldary júrgizilip jatyr», - deıdi Mamlıýt aýdandyq polıtsııa bóliminiń bastyǵy Petr Klımov.