SQO polıtseıleri halyqaralyq izdeýde júrgen baýkespe uryny ustady
PETROPAVL. QazAqparat – Soltústik Qazaqstan oblysynyń tártip saqshylary aqpan aıynan beri halyqaralyq izdeýde júrgen baýkespe uryny qolǵa túsirdi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Qostanaı oblysynyń 39 jastaǵy turǵyny qaraqshylyq jasaǵany úshin sottalyp, bas bostandyǵy shekteldi. Alaıda ol tıisti jazasyn óteýdiń ornyna qashyp
ketken. Aqpaı aıynyń sońynda Rýdnyı qalasynyń polıtsııasy qashqynǵa halyqaralyq izdeý jarııalady. Qylmysker Petropavldyń týmasy bolǵandyqtan, soltústikqazaqstandyq tártip saqshylary onyń júrýi múmkin jerlerdi baqylaýǵa aldy. Osyndaı jedel-tergeý is-sharalary barysynda er adamnyń qaıda ekendigi anyqtaldy. Ol tanystarynyń úıin jaǵalap, spırttik ishimdik ishýmen bolǵan. Qylmysker ustalyp, ýaqytsha ustaı ızolıatoryna qamaldy.
«Áriptesterimizge habar berdik. Ustalǵan adam túrli qylmys jasaǵany úshin birneshe ret sottalǵan. Buǵan deıin bas bostandyǵy shektelse, endi jaza ózgertilip, bas bostandyǵynan aıyrylýy múmkin. Krımınaldyq polıtsııa
qyzmetkerleriniń negizgi jumystarynyń biri – qylmyskerlerdiń júrgen jerin anyqtaý», - deıdi SQO PD bastyǵynyń orynbasary Rýslan Nazarov.
Jyl basynan SQO aýmaǵynda 4 qylmyskerge izdeý jarııalanyp, ekeýi ustaldy. Budan basqa krımınaldyq polıtsııa qyzmetkerleri basqa óńirler úshin úsh qylmyskerdi jáne taǵy sonshasyn reseılik áriptesterine ustap berdi.
