SQO polıtseıleri blokpostty aınalyp ótpek bolǵan jastardy ustady
PETROPAVL. QazAqparat – Soltústik Qazaqstan oblysynda blok beketti aınalyp ótpek bolǵan tórt adam ustalyp, úsh táýlikke qamaýǵa alyndy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 12 sáýirge qaraǵan túni Qyzyljar aýdanynyń ortalyǵy Beskól aýylynyń turǵyny men oblys ortalyǵynyń úsh turǵyny Petropavl qalasynan «Kia Spectra» avtokóligine minip shyqpaq bolady. Polıtseıler olardy № 1 blokpostta toqtatty.
Jigitter Báıterek aýylyndaǵy dostarynyń monshasyna jýynýǵa bara jatqandaryn aıtqan. Polıtseıler karantın kezinde qalaǵa kirip-shyǵýdyń shektelgenin, tek úlken júk kólikteri men azyq-túlik, taýarlar tasymaldaıtyn kólikterge ǵana ruqsat berilgenin aıtqan. Kólik júrgizýshisi mashınasyn Petropavl qalasyna keri burady. Alaıda birer shaqyrymnan soń trassadan túsip, aýyl arasyndaǵy jolmen shyǵyp ketpek bolǵan. Blokposttaǵy kezekshilikte turǵan saqshylar quqyq buzýshylardy baıqap qalyp, karantındik aýmaqtan shyqqanǵa deıin toqtatty. Medıtsınalyq kýálandyrý jolaýshylardyń mas emes ekenin kórsetti.
«Barlyq tórt jigitke qatysty «Tótenshe jaǵdaı rejımin buzý» boıynsha ákimshilik materıal jınaldy. Qyzyljar aýdandyq soty Beskól aýylynyń 1988 jyly, Petropavl qalasynyń 1990 jáne 1991 jyldary týǵan turǵyndaryn úsh táýlikke qamaqqa alý týraly sheshim shyǵardy. Karantın kezindegi saqtyq sharalary azamattardyń densaýlyqtary men ómirlerin saqtap qalýǵa, sondaı-aq qaýipti ınfektsııanyń taralyp ketpeýine baǵyttalǵanyn halyq esten shyǵarmaýlary qajet», - deıdi Qyzyljar aýdany polıtsııa bóliminiń bastyǵy Álıhan Baıqadamov.
