SQO polıtseıleri aıyppuly tólenbegen kólikterdi jolda ustap jatyr

PETROPAVL. QazAqparat - Soltústik Qazaqstan oblysynyń polıtseıleri ákimshilik aıyppulyn tóleýden jaltaryp júrgenderdi jolda anyqtap jatyr, dep habarlaıdy QazAqparat tilshisi. 

Oblystyq ishki ister departamenti baspasóz qyzmetiniń habarlaýynsha, boryshker júrgizip kele jatqan mashınalardy avtokeshen arqyly anyqtaıdy. Jyljymaly baǵdarlamalyq-apparattyq avtokeshenniń qoldanylyp júrgenine birneshe jyl bolǵan. Ol qaptaǵan avtokólikterdiń arasynan boryshker mingen mashınany jazbaı tanıdy.

«Ústimizdegi jyldyń alǵashqy 6 aıynda 72 myńnan astam ákimshilik quqyqbuzýshylyq anyqtalyp, jalpy somasy 272 mıllıon teńgeni quraıtyn aıyppul salý jóninde 35,6 myńnan astam qaýly shyǵarylǵan. Sonyń 191 mıllıon teńgesi óndirildi», - dep málimdedi ІІD baspasóz qyzmeti.

Polıtseılerdiń aıtýynsha, eger quqyqbuzýshy 40 kún ishinde aıyppul tólemese, jeke sot oryndaýshysynyń qaýlysymen boryshkerdiń mashınasy arnaıy avtoturaqqa jiberiledi.

Operatsııa úsh kúnge jalǵasady. Oǵan ákimshilik polıtsııa men jergilikti polıtsııa qyzmetiniń qyzmetkerleri barynsha jumyldyrylǵan.