SQO polıtseıleri asa iri kólemdegi geroın saýdasynyń jolyn kesti
PETROPAVL. QazAqparat - Soltústik Qazaqstan oblysynyń polıtseıleri asa iri kólemde geroın satpaq bolǵan kúdiktini ustap, esirtki zatyn tárkiledi, dep habarlaıdy «QazAqparat» HAA tilshisi.
SQO PD baspasóz qyzmetiniń habarlaýynsha, Esirtki qylmysyna qarsy is-qımyl basqarmasy jáne Krımınaldyq polıtsııa basqarmasynyń birlesken is-sharasy óz nátıjesin berdi. Tártip saqshylary jaldamaly páterde satýǵa daıyndalǵan geroın oramalary anyqtady. Alynǵan esirtkiniń jalpy salmaǵy shamamen 28 g, bul - asa iri mólsherge jatady.
Esirtki saýdasyna qatysy bar degen kúdikpen uqsas qylmys jasaǵany úshin buryn sotty bolǵan 1976 jyly týǵan Petropavl turǵyny ustaldy. Sot ony 2 aı merzimge qamaýǵa alýǵa sanktsııa berdi.
Mamandardyń aıtýynsha, atalǵan fakti «Esirtki, psıhotropty jáne sol tektes zattardy ótkizý maqsatynda ony zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» QR Qylmystyq kodeksiniń 297-babynyń 3-bólimi boıynsha Sotqa deıingi tergep-tekserýdiń biryńǵaı tizilimine engizildi. Atalmysh bap 10 jyldan 15 jylǵa deıin bas bostandyǵynan aıyrý túrindegi jazasyn kózdeıdi.
«Bıyl biz esirtki saýdasyna qatysty 18 faktini anyqtadyq. Esirtkini aınalymyn jedel anyqtaý, jolyn kesý úshin basqarma basqa bólinistermen udaıy ózara is-qımyl jasasyp otyrady», - deıdi Esirtki qylmysyna qarsy is-qımyl basqarmasy bastyǵy Jandos Basybaev.
Baspasóz qyzmetiniń habarlaýynsha, oblysta jyl basynan aınalymnan barlyǵy 73 kg 292 g esirtki alyndy, onyń 72 g - geroın.
