SQO polıtseıleri alty jyl boıy alıment tóleýden qashyp júrgen er adamdy Almatydan tapty

PETROPAVL. QazAqparat – Soltústik Qazaqstan oblysynda alıment tóleýden jaltaryp júrgenderdi anyqtaýǵa baǵdarlanǵan aktsııa júrip jatyr. Іs-sharanyń tórt kúninde polıtseıler mindetin oryndaýdan qashyp, balasyna qaryz bolǵan 9 adamdy anyqtady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavl turǵyny óz balasyna alty jyl boıy alıment tólemeı kelgen. Mindetin oryndaýdan jaltarǵan soltústikqazaqstandyq «ákeni» polıtseıler qazirgi ýaqytta Almaty qalasynda júrgenin anyqtady. Bul aqparat jeke sot oryndaýshysyna berildi.

Bul kúnderi óńirde SQO Polıtsııa departamenti kóshi-qon qyzmeti basqarmasynyń qyzmetkerlerimen alıment tólemeýshilerdi izdestirý aktsııasyn ótkizip jatyr. Alımentterin, ákimshilik aıyppuldaryn tólemeı júrgen boryshkerler, jaqyndarymen týystyq qatynastaryn joǵaltqan adamdar polıtseılerdiń nazarynda bolady. Aktsııa 19 jeltoqsanda bastaldy. Tórt kún ishinde izdeýde bolǵan 17 adam anyqtaldy. Olardyń 9-y alıment tólemeýshiler. Sondaı-aq, týystyq qatynastaryn joǵaltqan – 5, qaryzdaryn tólemegen 3 adam anyqtaldy. Kóshi-qon qyzmetiniń aıtýynsha, bul jumystar udaıy negizde júrgiziledi.

«Aktsııaǵa polıtsııanyń basqa da qyzmetteri jumyldyrylady. Jyl basynan kóshi-qon qyzmetiniń qyzmetkerlerimen oblys boıynsha barlyǵy 204 izdestirý isi toqtatyldy, onyń 22-si – týystyq qatynastardy joǵaltý, 78-i – boryshkerler jáne 104-i – balalaryna alıment tólemegender boıynsha», - deıdi SQO PD Kóshi-qon qyzmeti basqarmasynyń bastyǵy Talǵat Ábilov.