SQO polıtseıleri 80 jastaǵy qartty tonaǵan kúdiktini ustady
PETROPAVL. QazAqparat - Soltústik Qazaqstan oblysynyń polıtseıleri tonaýdy izin sýytpaı ashty, dep habarlaıdy Polisia.kz.
17 maýsymda saǵat 12:57 shamasynda 80 jastaǵy zeınetker tonaýshynyń qurbanyna aınalǵany jaıly «102» pýltine habarlasqan. Belgisiz bireý işinde 116 000 teńge aqshasy bar ámııan salynǵan sómkesin tartyp alyp ketken. Jedel basqarý ortalyǵyna qaraqshyny ustaý úshin polıtsııanyń barlyq syrtqy qyzmetterine baǵdar berilip, oblystyq aýrýhana aýdanyna jaqyn mańdaǵy patrýlder jiberildi. Petropavl qalasy PB patrýldik polıtsııa batalonynyń qyzmetkerleri belgileri boıynsha uqsas keletin er adamdy baıqaıdy. Patrýldik polıtsııa batalonynyń aǵa ınspektory polıtsııa leıtenanty Ómirserik Orazǵalıdiń aıtýynsha, polıtseılerdiń nazaryna shalbarynyń syrtqy qaltasynan kórinip turǵan áıelderdiń ámııany túsken. Ol alǵan zatyn polıtsııa kóliginiń kapotyna qoıǵan kezde urlyqqa qatystylyǵyna kúdik qalmady.
Buryn sottalǵan Aqmola oblysynyń turǵyny jýyrda Petropavlǵa kelip, ákki oılaryn iske asyrý úshin qala ortalyǵyn tańdaǵan. Tonaý faktisi QR Qylmystyq kodeksiniń 191-baby 1-bóligi boıynsha Sotqa deıingi tergep-tekserýlerdiń biryńǵaı tizilmine engizildi. Kúdikti Petropavl qalasy PB ýaqytsha ustaý ızolıatoryna qamaldy. Jábirlenýshi zeınetaqysyn az ýaqytta qaıtaryp bergeni úshin polıtseılerge alǵysyn bildirdi. Laqtyrylǵan sómke urlyq jasalǵan aýdannan tabyldy.