SQO polıtseıleri 6 blokposta kezekshilik etýde
PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrǵandardyń artýyna baılanysty alty blokpost qoıylyp, tártip saqshylary kezekshilikke shyqty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, alty blokpost eki aýdan ortalyǵynda qoıyldy. Ol jerde tártip saqshylarynan basqa taýarlar men kórsetiletin qyzmetterdiń sapasy jáne qaýipsizdigin baqylaý mamandary, medıtsına qyzmetkerleri jáne ákimdik ókilderi kezekshilik etedi.
Maǵjan Jumabaev aýdanynyń Býlaev qalasynda 9 qazannan bastap blokbeketter qoıyldy. Qazir aýdan ortalyǵyna kiretin joldarda 4 blokpost tur.
Mamlıýt aýdanynyń Mamlıýtka qalasynda 2 blokpost jumys isteıdi. Olar 12 qazan saǵat 00.00-den jumysyn bastady. Al Esil aýdanynyń ortalyǵy – ıAvlenka eldimekenine blokpostar qoıylmaǵanymen, munda polıtseıler patrýldeýdi kúsheıtti. Tártip saqshylary aýyl turǵyndaryna karantındik sharalar: maskalardy durys taǵý men áleýmettik ara qashyqtyqty saqtaý týraly eskerte otyra, kóshelerdegi qoǵamdyq tártipti qadaǵalaýda.
SQO polıtsııa departamenti bastyǵynyń birinshi orynbasary Qanat Aıtbaevtyń aıtýynsha, shilde aıynyń ortasynan bastap oblys boıynsha «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» babyn buzýdyń 1547 deregi anyqtalǵan. Onyń 745 faktisi Petropavl qalasyna tıesili.
Buǵan deıin SQO-daǵy úsh aýdan ortalyǵynda koronavırýsqa qatysty karantındik shekteýlerdiń kúsheıtilgenin aıtqan edik.
