SQO polıtseıleri 21 jyl boıy qujatsyz ómir súrgen áıelge kómektesti
PETROPAVL. QazAqparat – Soltústik Qazaqstan oblysynda kóshi-qon polıtseıleri uzaq jyldar boıy qujatsyz ómir súrgen áıelge kómektesti, dep habarlaıdy QazAqparat.
Oblystyq polıtsııa departamenti baspasóz qyzmetiniń habarlaýynsha, 1998 jyly Reseıdiń Qorǵan oblysynyń týmasy Almaty qalasynda jol apatyna ushyraǵan. Sodan keıin ol ótken ómirin umytyp, esin joǵaltqan. Ol kóp jyldardan beri Almatyda turyp keldi. Al týystary ony izdestirip, tapqanymen, otanyna ákete almady. Óıtkeni onyń qujattary joq edi. Áıeldiń 1974 jyly alynǵan tólqujaty joǵalyp ketken.
«Bıyl SQO-da turatyn týystary 50 jastaǵy áıeldi óz qolyna alyp, kóshi-qon polıtsııasyna júgindi. Basqarma qyzmetkerleri áıeldi azamattyǵy joq tulǵa dep taný úshin qujat jınaýǵa kómektesti. Sóıtip reseılik áıel azamattyǵy joq tulǵa retinde kýálik aldy. Endi ol óz otanyna bara alady» dep málim etti polıtsııadan.
Kóshi-qon polıtsııasynyń málimetinshe, jyl basynan beri ártúrli ómirlik qıyndyqtarǵa tap bolǵan 100-den astam adamnan qujat rásimdeý jóninde ótinish túsken. Taıaýda ǵana polıtseıler 30 jyl boıy eshbir qujatsyz ómir súrgen áıelge kómektesken edi.
