SQO Peterfeld aýylynda tájirıbelik mektep ashyldy
PETROPAVL. QazAqparat – Soltústik Qazaqstan oblysy Peterfeld aýylynda orta mektep quryltaıshy esebinen kúrdeli jóndeýden ótip, endi jańa baǵdarlama boıynsha bilim berýdi bastady, dep habarlaıdy QazAqparat tilshisi.
SQO Qyzyljar aýdany Peterfeld aýylyndaǵy Qyzyljar Abaı orta mektebi – senimgerlik basqarýǵa berilgen bilim ordalarynyń alǵashqysy. «Qyzyljar Abaı orta mektebi» qoǵamdyq qorynyń quryltaıshysy Raýan Kenjehanuly mektepti jónge keltirýge bıyl 300 mln teńge jumsady. Endi aýyldaǵy bilim ordasy «Nazarbaev Zııatkerlik mektepteri» DBBU tájirıbesi boıynsha balalarǵa dáris bermek. Zaman talabyna saı jabdyqtalǵan mekteptiń jumysymen QR Premer-Mınıstriniń orynbasary Eraly Toǵjanov tanysty.
Senimgerlik basqarýǵa berilgen oblystaǵy alǵashqy mektep Nazarbaev Zııatkerlik mektebimen birlese jumys isteıdi. Osylaısha ustazdardyń kásibı sheberligin, al oqýshylardyń bilim sapasyn arttyrmaq. Mektep basshylyǵy bolashaqta ınternat ashýdy jáne Qyzyljar Abaı orta mektebin tájirıbelik-resýrstyq ortalyqqa aınaldyrýdy josparlaǵan.
«Búgingi aýyl mektebi tek balalardy oqytýmen shektelmeýi qajet. Ol bilim berýmen qatar balalardy jańa zamanǵa beıimdeıtin, qazirgi ómirge qajetti daǵdylar qalyptastyratyn ortalyq retinde qyzmet etýi kerek. Árıne, mektep aldymen óz mindetin oryndap, oqýshylarǵa sapaly bilim beredi. Ol úshin baǵdarlama, oqý ádistemesi qaıta quryldy. Jaqsy nátıjege qol jetkizý úshin ustazdardy qoldap, yntalandyratyn bolamyz. Bul iste «Nazarbaev Zııatkerlik mektepteriniń» tájirıbesin negizge aldyq. Mektep zamanǵa saı jabdyqtalǵan», - deıdi Raýan Kenjehanuly.
Mektepti tanystyrý rásimine «Nazarbaev Zııatkerlik mektepteri» DBBU Basqarma tóraǵasy Kúlásh Shámshıdınova da qatysty. Jobaǵa oń baǵasyn berip, mekteptiń bolashaqta da NIS tarapynan qoldaý tabatynyn atap ótti.
«Maqsatymyz – aýyldyq mektepterde bilim sapasyn arttyrý. Munda eńbek etetin muǵalimder arnaıy oqýdan ótti. Bolashaqta osy mekteptiń baǵdarlamasyn basqa bilim berý mekemelerine engizý máselesin qarastyrý kerek», - deıdi Kúlásh Shámshıdınova.
